Pemanah kaul nyamin pengelikun menua

SARATOK: Kaban Parlimen Saratok Ali Biju madah rambai jaku ‘Sayangi Malaysiaku, Malaysia Bersih’ ke dipilih taun tu endang chukup engkeman dikena ngiri pemereti ati ba rayat di menua tu.

Tu meri reti besai dikena negapka kaul,pengangkun sereta penaluk kitai ngagai menua Malaysia.

Pia mega kimpin ngitau jalur gemilang siti peminta perintah besai kena nyungkak semangat patriotik mensia mayuh.

“Kaul rat rayat ulih nyamin pengelikun menua taja diuan rayat ti bebida pengarap pupu bansa.

“Kitai mega ulih nyeliah penekul enda disadang kelebih agi ba dunya nadai beadan,”ku Ali ti mega Kaban Kunsil Nengeri (Adun) Krian.

KAMI SAYAUKA MALAYSIA…Entara penyereta ke ngulu program nya bela ngitau Jalur Gemilang.

Teks jaku Ali dibacha Pemantu Khas iya Glenn Tulsa Anthony ba Program Kimpin Ngitau Jalur Gemilang Renggat Pelilih Menua Saratok ditu, kilah ensana.

Ali mega madah, mayuh berita sebubu ngapa ayan ba media rama ka tau ngeruga pengelikun, tang ketegal pemereti ati rayat semua nya ulih diseliah.

“Sama mih kitai angkat enggau ati angkunka menua mantu perintah besai nyaga pengelikun lalu meretika reti rambai jaku Hari Kebangsaan taun tu.

“Semangat baka tu ukai mina datai maya Hari Kebangsaan aja tang patut dikemeran dalam pengidup kitai besehari-sehari,”ku iya.

Berimbai enggau program nya mayuh aktiviti bukai bisi diatur nyengkaum panggau pemerindang ari raban ‘Nightstreet Busker’,koir enggau pantun (Kelab Malaysiaku) ari SMK BM Saratok enggau kelai ngelancharka pejalai raban Kembara Merdeka Jalur Gemilang.

Sama datai Pemesai Pelilih Saratok Muhd.Ikmal Abdullah,Ketuai Pansik Penyalah Pelilih Saratok ASP Joshua Apau, Ketuai Opis Pemadah Saratok Florence Sebastian Unting,raban ari Opis PKR Saratok enggau bala bukai.