Pemanah piak Che Hoe Khor ngagai ASADIA patut dipuji

KUCHING: Akademi Serakup Dayak Iban Sarawak (ASADIA) berasai siru ninga pengelurus ati piak Balai Raya Gerempung Pamanah Ulah Che Hoe Khor, Siburan ti udah meri pemendar ngagai sida nguna balai raya endur ngatur kelas ngajat.

Kenu ku Ketuai ASADIA, Mabong Unggang pemanah piak gerempung Che Hoe Khor patut dipuji laban Chairman iya, Lee Chin Chang udah meri pemendar nguna balai raya nya enda bebayar.

“Berasai ‘malu’ ninga penyiru jaku Tuan Lee ngasuh kami (ASADIA) nguna balai raya nya enda bebayar taja aku udah nerang sentang pengurang kami ba sukut belanja,” ku iya madah ngagai Suara Sarawak apin lama ke udah.

Diatu kelas Ngajat ASADIA di Siburan dipasuk 10 iku penyereta diatur ninting Hari Empat enggau Hari Lima belabuh pukul 7 nyentuk 9 malam nengah iring Puan Shania Xania.

Tandu Mabong, tuju kelas tu dikena ngidupka main asal Iban ba menua ti semak mengeri laban mayuh enda nemu ngajat.

Pia mega, juluk kelas tu diatur ba Siburan ngambika ulih nempa siti tim main asal ke ulih ngarika Batu Gong Siburan ba sebarang pekit tauka pengerami bekaul.

“Enggau peluang tu, aku meri terima kasih ngagai Penghulu Muari Anak Jugan ti udah bebendar nyukung pengawa ASADIA ngangkatka main asal aba Kampung Batu Gong.

“Arapka mayuh agi ketuai raban bansa sepenemu baka tu bisi ati ngangkat ke main asal kitai agai nembiak ti dipegai sida,” ku Mabong.

Kelas Ngajat aba Siburan nya agi dibuka agai mensia mayuh. Sapa ti deka nyereta tau datai ngagai balai raya tu.
Penerang silik pasal kelas Ngajat ASADIA ke diatur di Siburan ulih betelefon terus nuju Mabong ngena lumur 012-6925562.

GAMBAR KENANG : Mabong (bediri, lima kanan), Lee Chin Chang (bediri empat kanan), enggau Penghulu Muari Jugan begambar kenang enggau raban penyereta kelas Ngajat.

 

KELAS NGAJAT : Entara nembiak ke nyereta kelas Ngajat diatur ASADIA nenga iring Shania Xania.

Suara Sarawak