Pemanah rampa menua terus dijaga

KUCHING: Kepala Menteri Datuk Patinggi Abang Johari Tun Openg madahka pengawa Perintah Besai deka mulaika kuasa dalam Sempekat Malaysia 1963 (MA63) sentang pekara rampa menua di Sarawak siti pekara ti amat manah.

Iya ngasaika pekara tu ulih mantu Sarawak ngatika diri sereta ngintu pekara rampa menua kediri enggau meruan.
“Perintah Sarawak deka chakah agi ngena teknologi gadung ngambika meri empas ti manah ngagai rampa menua.

“Pia mega, perintah komited merambu ngena teknologi pemadu baru ba jeman ti deka datai ngambika ulih mutar penanggul rampa menua ti ayan,” ku iya.

Abang Johari bejaku munyi nya lebuh bejadika Hari Rampa Menua Renggat Nengeri Sarawak 2019 ba Dun ditu, pagi tadi.

Tandu iya, penyedar sentang guna nyaga rampa menua endang patut dikemeranka perintah.

“Nya alai, dalam mutarka penanggul rampa menua Perintah Sarawak ngemeratka pengawa nanam baru pun kayu ba kampung.

“Perintah mega mai piak peribit sama ngemeratka pengawa nanam baru pun kayu ba kampung,” ku iya.
Nangkan nya, iya mega madahka Perintah Sarawak sama seriris enggau menua bukai dalam ngena perengka ti enda ngeluarka gis karbon dioksida.

“Sarawak sama nguji nuju ngagai ekonomi hidrogen dalam ngetanka pengelikun rampa menua.

“Pengawa tu mujur dipeda lebuh tiga buah mengeri di Korea bepun ngena perengka hidrogen ditangkanka menua Jipun ti mandangka perengka hidrogen likun ungkup rampa menua,” ku iya.

Sama bisi datai Sapit Kepala Menteri Datuk Amar Douglas Uggah Embas, Datuk Amar Awang Tengah Ali Hasan, bala menteri, bala menteri muda enggau bala bukai.