KUCHING: Tubuh niang Kaban Kunsil Nengeri (ADUN) Jepak Datuk Talib Zulpilip mujur ditanam pukul 10.10 malam Hari Lima ba Raudhatul Sakinah Kuching (RSK), Semariang.
Penyinu ati sida niang sebilik enggau bala bakih ke bukai tampak dipeda laban berasai puang ditinggalka siku da tokoh ti mayuh jasa ngagai rayat. Sama datai meri basa kepenudi ngagai niang, Pemangku Tuai Pemegai Menua (TYT) Nengeri Sarawak Tan Sri Datuk Amar Mohamad Asfia Awang Nassar enggau bini, Datuk Fatimah Mohamad Iskandar.
Premier Datuk Patinggi Tan Sri Abang Johari Tun Openg ke datai urung pukul 8.40 malam sereta bala tuai bukai sama datai ngulu pengawa nya.
Nambah ke nya, kaban belayan enggau bala bakih niang sama datai meri basa kepenudi ngagai niang ba kompleks nya sebedau pengawa nganjung niang ba pendam semak dia. Tubuh niang dianjung ke pendam urung pukul 9.50 malam ungkup bacha talkin enggau sembiang dikenataika Imam Besai Nengeri Sarawak Datuk Mustpha Kamal Ahmad Fauzi, sebedau ditanam.
Dulu ari nya, ex-Menteri di Opis Kepala Menteri (Integriti enggau Ombudsman) nya dituku madam ke seput dua hari pengudah hari pengada ke 72 taun urung pukul 5.50 lemai ba Palan Perubat Pakar Normah, ditu.
Niang nganjung diri berubat urung pukul 7 pagi kia udah dipasuk ngagai Unit Sakit Raya (ICU) urung pukul 10 pagi sebedau dituku madam ke seput pukul 5.50 lemai.
Iya dituku bisi penanggul ba rengka tubu nyengkaum atau, buah punggung enggau ke bukai kelimpah bisi tinggi darah.
