KUCHING: Bajet Sarawak 2024 dikeandal deka meri perati ngagai pemansang infrastruktur enggau perengkaguna dikena nambah ekonomi nengeri ari sukut beranakka puku.
Penganalisis Sosiologi Politik, Dr Novel Lyndon madah, pengawa meri perati ngagai pemansang infrastruktur beguna amat laban nya deka meri pemaik ngagai Sarawak.
Iya madah, nya nyengkaum matak bala pemeranak puku antarabansa enggau dalam menua kelebih ari ba sektor pengangkut, betanam betupi enggau kilang.
“Kebuah pia laban semua sektor tu deka nyungkak ngagai pemansang modal mensia pengereja pengawa Sarawak kelebih agi raban nembiak tauka sida ti tembu Sijil Pelajaran Malaysia (SPM),” ku iya lebuh dirandau Suara Sarawak.
Dr Novel mansutka jaku nya lebuh dipinta ngelansa senentang Bajet Sarawak 2024 ti deka dibantai Premier Sarawak, Datuk Patinggi Tan Sri Abang Johari Tun Openg ba Aum Kunsil Nengeri (DUN) sehari tu.
Iya ngarap Bajet Sarawak 2024 nya bela meri perati ngagai sektor betanam betupi enggau sektor kuasa ulih dikena baru.
Terang iya, bajet nya patut nempa ekonomi Sarawak ti meruan agi sereta nyendia ekosistem ti ulih nyungkak ekonomi ba sitak menua pesisir.
“Pia mega, pekara ti patut diberi perati nyengkaum pengawa nyendia infrastruktur ba sitak menua pesisir kelimpah nyendia rumah ulih diempu ungkup bala nembiak sereta rayat ti udah nikah enggau nyuwa ba mengeri besai ba Sarawak.
“Kemaya hari tu, entara isu ti balat nating rayat Sarawak kelebih agi sida ti gawa ba mengeri besai ba Sarawak ditu iya nya belanja rayat besai agi ari penatai pemisi sida.
“Nya alai, perintah diperansang nyendia rumah ti ulih diempu ungkup rayat diri,” ku iya.
Nambahka nya, iya ngarap Perintah Sarawak ulih nyendia sekularship penuh ngagai bala graduet ti nampung pelajar sida ngagai palan pelajar tinggi (IPT) enda ngira kus diambi sida.
Pekara bukai ti patut dikemerat, ku iya, nyengkaum pemansang ekonomi lokal baka produk main asal tauka eko dagang temuai.
Iya madah, kebuah pia laban sitak menua pesisir Sarawak endang tebilang enggau produk eko dagang temuai ti ulih dikelaku ba renggat ti tinggi agi.
“Nya mai reti, Bajet Sarawak 2024 tu patut meri perati ngagai pengawa ti nyungkak ekonomi rayat bepelasar ke rentayan sosioekonomi.
“Ambi ke chunto, adan entara Sarawak-Kalimantan patut nyadi agenda besai Perintah Sarawak berebak ari segang pengawa mindah enggau ngaga indu mengeri Nusantara-Indonesia ila,” ku iya.
