Pemansang infrastruktur di Pakan mesti dirumban

Randau ruai pengari Suara Sarawak enggau Protem Chairman Gerempung Pemansang Nembiak Rebak Baru (PNRB) Pakan/Julau, Jamal Abdullah bekaul enggau pemansang ti patut nerima perati tumu sereta patut dirumban perintah di Pakan.

SUARA SARAWAK : Tabi Tuan Jamal, nuan dipeda siku ari orang ke chukup regas betemu enggau rayat Pakan ditu, nyadi ulih nuan ngelansa baka ni ari sukut peragam perati nuan empu pendiau ekonomi sida lalu chara ngangkatka tikas penatai pemisi rayat ditu?

JAMAL ABDULLAH : Kebendar baka tu, chara dikena nyungkak ikas penatai pemisi peranak Pakan ba aku iya ke pemadu beguna iya nya pemansang infrastruktur.

Tu nyengkaum baka ngaga jalai alun, bekal kuasa karan, ai beresi enggau arus internet nuju semua genturung pendiau lebih agi rumah panjai ti bisi ditu mesti digaga enggau menyana.

Kedua, perintah patut chakah agi mantu peranak Pakan ngemansangka industri betanam betupi ti bebatang baka lada, sawit enggau kebun sayur nengah chara mantu sida ngelakuka produk sida nuju menua luar kelimpah ari industri Dagang Temuai enggau nyadi pengatur program tauka pengerami ti bebesai dikena narit penatai orang luar datai ke Pakan.

Protem Chairman PNRB Pakan Julau, Jamal Abdullah

Enda lama agi kitai bela nemu Sarawak nyau majak sempil awak endur patut ngatur pengawa bepilih. Nama pesan nuan tuan ngagai sebarang chalun ke menang ungkup pemansang menua Pakan.

Munyi ku jaku aku ba pun randau tadi ari sukut pemansang betanam betupi, jalai kebun sawit enggau lada mesti diaduka sereta digaga manah agi ngambika orang betanam betupi muntang sereta nyamai agi ngangkut tau berundanka asil ari kebun sida.

Tu beguna amat kelimpah ari bantu bukai baja enggau rachun sereta palan bejual ti mendam mega patut didirika ba Simpang Pakan sebaka enggau palan bejual ti bisi di Sibu,Sarikei enggau Bintangor.

Kelimpah ari nya, siti palan pengumpul asil lada mega patut digaga nengah Koperasi Rakyat Pakan.
Pekara bukai iya nya aku arapka semua ejensi perintah suah agi bejalaika pengawa ngundang betanyaka penanggul rayat ba genap genturung pendiau tauka rumah panjai di Pakan ngambika rayat ulih mansang nitihka juluk perintah enggau rambai jaku Menua Mansang Taun 2030.

Mayuh orang ba luar dedin tentu deka nemu ari ni penatai belanja dikena nuan bejalaika inisiatif mantu mensia mayuh ke tusah ngelama tu.

Rampa menua pasar Pakan.

Penatai pemisi dikena aku bejalaika inisiatif mantu orang ti kurang bepemisi ngelama tu datai ari Zakat Gaji enggau Zakat Dagang aku empu kelimpah bisi mega pupu ari bala bukai dalam Gerempung Pemansang Nembiak Rebak Baru (PNRB) Pakan/Julau empu.

Naka tu, bisi 43 iku nembiak sekula udah nerima bantu ari aku lalu tebal agi sida endang peranak Pakan enggau Julau ti begunaka tambah agih belanja kena nampung pelajar sekula ba Palan Pelajar Tinggi (IPT) enggau Universiti ba selampur menua tu.

Ni pengelama nuan udah bejalaika pengawa meri bantu baka tu?

Enti enda salah ingat aku pengawa baka tu berengkah taun 2008 suba, bepun ari siku nembiak ti kurang bepemisi sereta bulih nyambung belajar ngagai universiti tang tejanggal ketegal suntuk belanja. Nya alai,laban endang siru meda orang tusah dia aku enggau naka ulih nguji nulung mutar penanggul ditapi iya maya nya.

Bisi tauka enda orang bukai meransang nuan ngereja pengawa baka tu?

Nadai orang ari belakang tauka meransang tang semua utai ti nyadi sigi bepun ari peneleba aku dalam pengidup diri lalu enti ulih aku enggai neju anak bansa kitai Iban napi pemerinsa tauka penanggul baka ti kala ditapi aku kelia lebih agi enti bekaul enggau pekara pelajar sekula.

Ketegal penyuntuk mih ti ngujung ke aku enda ulih nyambung pelajar taja pemutus peresa aku manah, taja pia nasit petara nyangkung lalu aku mujur nembuka pelajar aku pengudah aku gawa iya nya nembuka pelajar Master of Science in Occupational Safety and Health ari Universiti Utara Malaysia (UUM).

Sekumbang Atur Mindah Betagang (PKP) diteritka perintah, nuan dipeda bisi limpang nganjung bantu ngagai peranak rumah panjai di Pakan. Ulih nerang pasal pengawa nya.

Puji Tuhan, endang amat maya PKP tu tadi aku bisi nganjung bantu barang pemakai baka beras sepenyampau 3000 kampit ngagai rumah panjai nyemgkaum bantu ungkup sida ti diau ba sebelah Pasar Pakan ditu.

Au pia,ngarapka bantu nya ulih ngelempungka tating sida iya mih. Kati bisi pemar kini udah ditapi sekumbang bejalaika pengawa NGO tu tuan?

Pengawa baka tu endang udah sebulu enggau aku ari kelia. Kekadang berasai enda lantang ati enti aku enda telimpang ke awak diri ngesah kaban belayan tauka orang di menua lebuh sida bisi penanggul tauka ditinggang penusah berat.

Sebedau ngujungka randau,nama jaku lalau nuju peranak Pakan?

Au, ngena peluang tu aku meri besai terima kasih ngagai nuan (penulis) ti udah sanggup limpang ngerandau aku baka ke sehari tu.

Pia mega, chukup besai pengarap aku deka meda menua asal aku di Pakan ditu ulih sama mansang baka pelilih bukai ba Sarawak.

Arapka semua kitai bela sepenemu, besukung betulung enggau pangan diri ba sebarang aja penusah ke ditapi. Tuju iya awakka penusah berat tau nyadi lempung. Beserimbai enggau Hari Krismas enggau Taun Baru 2021 aku besampika semua kitai bela teulihka pengerai pengelantang enggau pemujur ba pengidup. Tuhan merekat.

Suara Sarawak