Pemansang lumba elektronik disukung

NFO
Korea nyadi menua Asia keterubah ngembuan opis menteri dalam lumba elektronik dikumbai Opis Menteri Lumba Elektronik.

BINTULU: Perintah Gabungan Parti Sarawak (GPS) sedia nyukung pekara ti dikerindu raban biak dalam pemansang lumba elektronik di nengeri tu.

Kepala Menteri Datuk Patinggi Abang Johari Tun Openg merambu ngambika siti aktiviti ngangatka program lumba elektronik diatur kelai sukung ngagai menua ti deka nyereta lumba tu ba Lumba SEA di Manila Philiphines, bulan November tu.

Pia mega, dikena bejalaika aktiviti nya, iya ngelempaika pangku pengawa tu ngagai Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah enggau Menteri Muda Nembiak enggau Lumba Datuk Snowdan Lawan ungkup atur bukai.

Abang Johari mansutka jaku nya rambau bejadika pengawa nyuaka perais Pekit Lumba Elektronik Hari Sarawak 2019 bepalan di NAIM Street Mall, Paragon ditu.

Nambahka nya ku iya, lumba elektronik tu siti rekreasyen ke baru ngena perengka elektronik ti begunaka pengelandik kelimpah penau enggau rinduka lumba tu.

Ku iya mega, tiap pejalai lumba tu begunaka strategi seraya madahka Korea nyadi menua Asia keterubah ngembuan opis menteri dalam lumba elektronik dikumbai Opis Menteri Lumba Elektronik.

Pekit ti berengkah 20 ngagai 22 Julai tu sebagi ari aktiviti ngintu Hari Sarawak 2019 lalu mujur matak 130 penyereta lumba elektronik FIFA 19 enggau 320 penyereta ari 64 tim ungkup lumba elektronik Mobile Legends.

Kelimpah ari nya, tim Space-L nyadi champion lumba elektronik FIFA 19 mujur mai pulai duit RM5,000 enggau midul.

Lumur dua enggau ketiga diempu tim Ff-infamous enggau MANOOB . Tim tu mai pulai duit RM3, 000, midul enggau setipikit lalu lumur tiga nerima duit RM2,000, midul enggau setipikit.

SERURAN NYUKUNG…Datuk Patinggi Abang Johari enggau bala menteri bukai begambar ungkup kenang begulai enggau pengari tim Space-L ti menggi lumba elektronik FIFA 19.