KUCHING: Sukut pemansang menua pesisir entara elemen besai ti disadang deka dibantai ba Bajet Sarawak 2024 sehari tu dikena ngeranchak pemansang ekonomi ba sitak nya.
Profesor Sains Politik enggau Kaul Antarabansa ari Universiti Malaysia Sarawak (UNIMAS), Dr Neilson Ilan Mersat madah, sukut nya disadang deka dibantai berebak ari agenda negap pemansang menua pesisir ti majak dikemerat Perintah Sarawak.
Dikena ngerapit takah ekonomi enggau infrastruktur baka ba mengeri, iya madah, ejensi pemansang dipelaba deka diberi agih belanja ti mayuh agi ti ulih mai ubah signifikan ngagai Sarawak.
“Nya ulih mantu Sarawak mai transformasyen sosioekonomi enggau pemansang ba Tanah Kenyalang ngambi nyadi nengeri maju manggai 2030,” ku iya lebuh dirandau Suara Sarawak.
Dr Neilson mansutka jaku nya rambau dipinta melaba pekara ti deka dikemerat Bajet Sarawak 2024 ti deka dibantai Premier Sarawak, Datuk Patinggi Tan Sri Abang Johari Tun Openg ba Aum Kunsil Nengeri (DUN) ditu, sehari tu.
Nangkan nya, entara ejensi pemansang ba Sarawak baka Kaunsil Pemansang Koridor Wilayah (RECODA), Ejensi Pemansang Ulu Rajang (URDA), Kaunsil Pemansang Tanah Tinggi (HDA), Kaunsil Pemansang Wilayah Utara (NRDA), Ejensi Pemansang Sri Aman (SADA) enggau ti bukai.
Iya madah, semua ejensi pemansang nya patut nerima agih belanja tauka diberi perati besai ba bajet sekali tu.
Kebuah pia, ku iya, ngambi peranak menua pesisir enda tinggal ba pemansang sereta ulih ngasaika perengkaguna sebaka.
