KUCHING: Lebuh ngingat genap 60 taun Sarawak Merdeka, udah tentu bisi tuju enggau tunga kuing ti baru, ku Premier Datuk Patinggi Tan Sri Abang Johari Tun Openg.
Ku iya, tuju enggau tunga kuing nya ulih mantu Perintah Sarawak seruran bejalaika pemansang dudi hari.
“Enti ari sukut terminologi, teknologi pemadah (IT), kitai ngena navigasyen Sistem Penuduk Global (GPS) ba kompas, lalu Sarawak mega betuah bisi Gempung Parti Sarawak (GPS) ti nemu tuju enggau tunga kuing perintah.
“Kitai (GPS) nemu tuju iya, lalu kitai udah matih nembiak ngambi nampung pemansang nuju 60 taun ti deka datai.
“Nya kebuah kitai bisi Palan Penyulut Teknikal (CENTEXS) ngambi matih sida (nembiak) napi ubah tu,” ku iya.
Abang Johari mansutka jaku nya lebuh bejadi konvoi Kembara Sarawak nyerumba genap taun Sarawak merdeka ke-60 di Taman Awam Lawas ditu kemari.
Iya madah, tunga kuing nya mega nyengala betul lebuh iya dilawa raban bank ti nyulut ari Singapore empai lama ti udah.
“Sida madah ngagai aku sida ulih meda pengulih besai Sarawak lalu pengidup kitai jemah ila nunga kuing ti betul.
“Nengah pengulih ti dikemisi kitai, sida mega madah Sarawak engka deka nyadi kuasa ekonomi ba rantau tu. Ukai Malaysia tang ba rantau tu.
“Pengulih kitai ti engka enda dikemerat kitai dipeda orang luar. Nya alai, kitai meseti nyaga penyerakup kitai.
“Semina nengah penyerakup, penegap politik enggai perintah ti teguh, Sarawak ulih nyadi nengeri pemadu mansang di Malaysia manggai ba taun 2030,” ku iya.
Berebak enggau nya, Abang Johari madah pemansang ti benung digaga udah tentu meri empas besai ngagai rebak baru.
Nya kebuah, ku iya, kitai enda ibuh meda penatai asal enggau jalai pengarap lalu meseti begempung nyadi anak Sarawak ke ngemansang Sarawak ngagai tuju ti tinggi agi.
“Aku mega majak tuai, nya alai aku ngarap rebak dudi hari deka nyambung pengawa ngemansang Sarawak enggau Malaysia nyadi menua ti pemadu nyulut ba rantau tu.
“Anang enda ingat mega, aku ngarap ke pengalih ekonomi kitai ngagai ekonomi moden bepelasar ke ekonomi gadung ti deka nyadi chunto ngagai dunia,” terang iya.
Bisi mega datai Sapit Premier Datuk Amar Awang Tengah Ali Hasan, Speaker Kunsil Nengeri (DUN) Sarawak, Datuk Amar Tan Sri Mohammad Asfia Awang Nassar, Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah, Sekretari Perintah Sarawak, Datuk Amar Mohamad Abu Bakar Marzuki sereta temuai basa bukai.
