BINTULU: Sapit Menteri Infrastruktur enggau Pemansang Penyangkai Kapal Sarawak ti mega Adun Samalaju, Majang Renggi mujur dipilih ngetuai Gerempung Nasional Nembiak Besatu Sarawak (Saberkas) Pampang Samalaju ungkup sesyen 2023-2026.

Lalu Komiti Saberkas Ismawi Ishak enggau David Lambek Thomas Nyaring dichiri nyadi sapit chairman.

Bisi enam kaban komiti ti mujur dipilih nyengkaum Mohd Khairul Raini, Rinnie Joseph Nyelang, Mohd Assoddin Narawi, Bent Umban, Ogy Sinin enggau Dayena Fathehah Mohri.

Pia mega, Carlson Endawie dichiri nyadi sekretari lalu dibantu Roziela Menon enggau Julius Tugau ti nyadi penulung sekretari sereta Joeblis Minggat dichiri nyadi tukang wang.

Ku Majang, iya bedanji bejalaika pangku pengawa enggau manah sereta lurus ati.

Adun Samalaju nya madah, nengah pengawa nya, Saberkas Pampang Samalaju ulih bekerejasama enggau serikat sereta pengemeran industri ti bepalan di sitak industri Samalaju ngatur bemacham aktiviti ke pemaik raban nembiak di sitak Bintulu kelebih agi Samalaju.

Iya meransang mensia mayuh kelebih agi bala nembiak di sitak Dun Samalaju ngaul gerempung nembiak pemadu besai di Sarawak nya.

Pengawa nyiri nya digaga ba Aum Penumbuh Saberkas Pampang Samalaju di Hotel Li-Hua, Bintulu Sentral, ditu tadi.