KUCHING: Enam ejensi perintah mantu ngemujurka Program Hari Begulai Negapka Apai Indai enggau Pentafsiran Bilik Kelas (PBD) Sekula Primari (SK) Merdang ditu, Hari Tiga tu tadi.

Kepala Pengajar SK Merdang, Achong Bujang madah, ba taun tu, program nya diintu chukup richah enti dibanding enggau taun sebedau tu.

Ku iya, ngelama tu, program sebaka semina diatur entara bala pengajar, apai indai enggau nembiak sekula aja.

“Tang sekali tu, program tu bela nerima kerejasama ari tujuh ejensi perintah enggau peribit ti mantu ngemujur sereta ngerichahka agi program tu.

“Tu nyengkaum raban ari Balai Polis Pelilih Samarahan, Klinik Pengerai Samarahan, Ejensi Benchik Dadah Pelilih Samarahan, Balai Bomba enggau Penyelamat Samarahan, Kaunsil Pemansang Kraf Jari Malaysia, Pustaka Nengeri Sarawak sereta Hong Leong Bank.

“Kelimpah meri pengaga ngagai bala nembiak nengah bemacham aktiviti diatur, kerejasama tu mantu meri penyedar ngagai komuniti kelebih agi apai indai bekaul sekeda pekara,” ku iya ba sebengkah penerang.

Entara aktiviti bisi diatur ba program nya baka licha apai indai ari raban polis, licha nagang penusah angus, eksibisyen dadah enggau pengawa meresa pengerai.

Nambahka nya, pengawa muka akaun bank ungkup bala nembiak enggau apai indai, kem kraf jari sereta aktiviti Nilam mega bisi diatur.

“Aktiviti baka tu beguna amat mantu bala nembiak ngulih penerang beguna dikena nyikap enggau meri peneleba ngagai sida senentang gaya idup ti amat.

“Nya alai, aku beterima kasih ngagai semua raban ti udah ngemujur program tu nyengkaum bala ejensi perintah enggau peribit, apai indai, pengajar sereta nembiak sekula tu empu.

“Aku ngarap mayuh agi ejensi bukai bekerejasama ngemujurka program tu dudi hari dikena nempa modal mensia menyana,” ku iya.