Pemansang sebela nyadi menua maju – PM

KUALA LUMPUR: Malaysia enda deka nyapai pemujur nyadi sebuah menua maju enti sema puntan nyemelaka pemansang fizikal enggau ngintu rampa menua asal sereta ngetanka rampa menua ngelingi ti meruan ke bisi diatu ku Tun Dr Mahathir Mohamad.

Ku Menteri Besai pengawa ngintu rampa menua asal enggau kandang ngelingi ungkup rebak ke diatu enggau dudi hari nyadi tanggungpengawa kitai empu sereta begulai, lalu tanggungpengawa nya patut seruran dipejalai nadai ngira nama bagi pekara ke nyadi.

“Kitai udah meda pangka pemansang tu enda dipejalai nitihka ripih ti meruan lalu semina ngiga untung aja.

“Kitai meseti sedar, pengawa nyadi sebuah menua maju enda ulih dijapai tauka diaku enti sema pekara ti ulih dipandangka kitai iya nya begunan tinggi tang sungai kitai kamah, kampung semina tinggal tanah kusi enggau angin kena enseput mega kamah,” ku iya lebuh bejadi ba pengawa ngintu Hari Bumi di Taman Tugu, ditu kemari.

Dr Mahathir disempulang Tun Dr Siti Hasmah Mohamad Ali enggau Menteri Pekara Ekonomi Datuk Seri Mohamed Azmin Ali, Menteri Kuasa, Teknologi, Sains, Ubah Gaya Hari enggau Rampa Menua Yeo Bee Yin, Menteri Wilayah Persekutuan Khalid Abd Samad sereta Menteri Ai, Tanah enggau Pengeraja Asal Dr A. Xavier Jayakumar.

Ngelansa pasal pengawa ngintu Hari Bumi tauka dikumbai Earth Day diintu kena 22 April ninting taun, ku Dr Mahathir, sedarka pengawa nyaga rampa menua patut diterenak enggau dikunsi semua serap komuniti.

Nya alai, pengawa ngintu Hari Bumi di Taman Tugu, sebuah taman kampung 26.7 hektar pemesai ba tengah mengeri Kuala Lumpur mega kelai pengeran perintah nentuka pemansang fizikal ti sebela enggau pemansang rampa menua, ku iya.

“Taman Tugu tu kelai pengeran kitai nentuka pemansang ti sebela iya nya pemansang fizikal setipak enggau pengawa ngintu rampa menua.

“Aku dipadah urung 4,000 pun kayu kampong ujan asal Malaysia udah ditanam ngelingi Taman Tugu tu.

“Tu tambah ngagai urung 1,000 pun kayu asal ditu empu ti diintu. Nya kebuah taba Taman Tugu endur ngintu Hari Bumi taun tu ngemai reti enggau kelai chukup besai,” ku iya.

Tuju bukai Projek Taman Tugu dikena nempa mayuh agi raban ti talukka rampa menua nengah program pelajar mensia mayuh ti dipejalai kelebih agi maya ujung minggu, ku iya.

Tun Dr Mahathir Mohamad