BINTULU: Pemansut gas asli ba kandang tasik Sarawak engka ulih dirandang nyentuk Telok Melano di Lundu.
Premier Sarawak, Datuk Patinggi Tan Sri Abang Johari Tun Openg madah, pengawa Sarawak nagih bekunsi enam medan minyak baru ti ditemu Petroliam Nasional Berhad (PETRONAS) ba kandang tasik nya semina enggau tuju nambah pemansut gas ungkup menua.
“Nya kebuah, enti kitai bisi niat baka nya ngadu pengawa manah, aku ngasaika kitai deka ngiga mayuh agi pemansut ba kandang tasik Sarawak.
“Aku andal ari sukut geologi, hidrokarbon (pemansut asal) ulih dikemansang nyentuk Telok Melano, Lundu ba endur Yang di-Pertuan Agong nemuai.
“Enti pekara tu nyadi, kitai bisi rizab gas nya,” ku iya. Abang Johari mansutka jaku nya ba Program Penyikap Gas Keterubah Fasiliti Nyual Gas Tambah Bintulu (BAGSF-2), di Tanjung Kidurong, ditu kemari.
Abang Johari mega madah, lebuh nya nadai teknologi dikena ngiarka karbon dioksida ari gas masam.
“Tang diatu kitai bisi teknologi.
Reti iya kitai ngambi karbon pulai baru ke dalam telaga nengah pengawa nangkap, ngena enggau nyimpan karbon (CCUS).
“Kami ngemansang industri baru lalu tu deka meri pemaik ngagai nengeri enggau menua,” terang iya nyemetak.
Sama datai Sapit Premier Sarawak ke mega Menteri Dagang Antarabansa, Industri enggau Beranakka Puku sereta Menteri Pemansang Mengeri enggau Pengeraja Asal, Datuk Amar Awang Tengah Ali Hasan, Menteri Industri Pemakai, Komoditi enggau Pemansang Wilayah Sarawak, Datuk Seri Dr Stephen Rundi Utom, Menteri ba Opis Premier Sarawak, Datuk John Sikie Tayai, Chairman Sarawak Petchem Sdn Bhd, Tan Sri Datuk Amar (Dr) Abdul Aziz Husain, Direktor Ukai Eksekutif PETRONAS, Datuk Ibrahim Baki enggau Mandal Presiden Kanan Pengatur Pekara Petroleum Malaysia, Mohamed Firouz Asnan.
