Pemar bemalam ba buding ngajar nembiak ngidupka diri

KUCHING: Pemar ditapi bemalam ba buding ngajar bala nembiak ke belajar ba menua ulu kering ati sereta meransang pengelandik ngidupka diri maya jauh ari apai indai.

Ba siti penerang ari blog Cikgu Emmet Menulis, Ahmad Faizal Osman tauka Cikgu Emmet madahka di Sarawak, Sabah enggau sekula Orang Asli di menua ulu Semenanjung, bala anak mit berengkah diau ba buding ari sida berumur enam tauka tujuh taun.

“Berindik ari penanggul logistik ti nekul sida jauh ngenataika diri ke sekula mejal sida diau ba buding laban nya siti ari chara ti manah dikena sida mutarka penanggul nya.

“Ketegal deka neruska pelajar enggau ngulihka penemu baka orang bukai, sekeda ari nembiak ba menua ulu ninggalka apai indai sida lalu diau di buding berengkah ari umur sida enam enggau tujuh taun,” ku iya.

Ku Pengajar Emmet, mayuh cherita didinga ke alai bala anak mit tu bebendar belajar ngidupka diri di buding kenyau umur sida agi biak.

“Sekeda ari sida bekunsi baju enggau tanchut enggau bala bakih. Sekeda belajar ngangkat baldi ngagai bilik mandi kena masu gari diri. Sekeda udah nemu nusun peninduk diri empu berengkah ari sida berumur tujuh taun.
“Ba buding, sida bela diajar enggau nadai bida baik sida orang pemisi tauka seranta kelebih agi ba menua Sarawak enggau Sabah ke alai mayuh entara sida tu anak ti datai ari raban B40,” ku iya nambah.

Kunchi dikena sida ngidupka diri ba buding tu siti ari pengelandik bala anak mit tu mega nerenak kaul kerejasama rama enggau pangan diri.

Nya alai ku Pengajar Emmet, ulah bekunsi tu siti pekara ti biasa digaga sida dikena sida nerenak kaul ti manah begulai enggau bala kaban.

“Sida mega enda kiruhka pengawa bekunsi perengka pemakai baka tray tauka changkir. Mimit bela bulih mimit, mayuh bela bekunsi.

“Sida mega enda besemekih enggau pangan diri tang ngembuan ulah mantu kaban ke bukai lebuh bisi penusah,” ku iya.

Nangkan nya mega, Pengajar Emmet madahka bala anak mit enggau nembiak tu tetap kering nempuh mayuh macham penguji ba buding tang jauh ari apai indai.

Tiap Hari Lima endang hari ti pemadu dianti sida laban nya mih maya sida betemu enggau orang dikesayau sida ngambi sida pulai ke rumah.

Bala anak ari sida Primari Satu tiap malam nyabak tang lebuh bala kaban sida nanya kebuah nya,saut sida chukup sinu. Ketegal lelengauka indai.

“Ukai ari pemar fizikal aja tang mega pemar ari sukut runding.

“Berengkah ari umur sida tujuh taun nyentukka 12 taun udah jauh ari apai indai, ditampung agi lebuh sida nampung pelajar ngagai Sekula Sekondari enggau Universiti. Berapa belas taun sida jauh ari apai indai ketegal deka ngiga penemu?,” ku iya nanya.

Taja pia ku pengajar Emmet, sida nadai pilih ke bukai laban belajar ba sekula aja chara sida ulih mansutka diri ari penanggul seranta.

“Nya mih ti ngasuh sida kering. Pengudah sida mansang besai, sida ulih begigaka jereki ba dini-dini alai nyengkaum di Semenanjung tauka menua luar. Sida udah chukup kering sereta tan ati enggau pengidup nya,” ku iya.