Pemar nadai internet di menua ulu

KUCHING: Begantungka kibung sereta bekeradai di kebun getah dikena ngulihka internet enda nagang siku nembiak Universiti Pendidikan Sultan Idris (UPSI) nembuka pengawa pelajar iya.

Nembiak ke ngena nama Rose ED ba facebook nya madahka penemu ngulihka internet ba babas tauka silik agi ba kebun getah nya diambi iya pengudah meda video siku nembiak di Sabah (Veveonah Mosibin) ngena kibung ba babas ngambika nagang diri ari nyamuk.

Ngarapka piak bekaul ulih mending sereta beratika sebana iya bekaul enggau penanggul menua sida ke nadai penyambung internet ti manah, Rose mansutka cherita enggau peneleba iya diau ba kebun getah semina deka ngulihka internet dikena nembuka pengawa iya.

Ku iya, kenaka 24 June tu tadi iya baru nembuka pengawa gerempung nengah sistem MyGuru ti patut udah tembu minggu dulu ari nya.

“Berindik ari internet ti enda manah ba menua ulu, pengawa nya ditangguh dulu laban aku enda ulih sama enggau pengawa nya.

NYIKAP DIRI… Rose benung nembuka pengawa online iya ba dalam kibung ke ditanchang ba sebelah pun getah. -Gambar Facebook

“Nya alai sehari tu aku tumu nyikap diri sebedau pengawa nya berengkah,” ku iya.

Ku Rose, endur iya ngadu pengawa ba babas tauka kebun getah nya ngembuan peneras japai internet ba endur nya manah agi ari ba rumah panjai sida.

“Taja genturung pendiau kami nadai internet tang bisi sekeda ba menua tu ulih alai ngiga internet baka endur ke bebukit, kebun sawit enggau ke bukai.

“Endur tu enda ulih dilawa ninting hari laban aku bisi kelas ti penuh kelimpah ari Hari Dua enggau Hari Minggu.

“Sehari tu, aku milih endur tu laban semak enggau kebun apai, lalu udah tembu kelas lagi aku ulih mantu apai nyeleti langkau ba kebun ngambika ulih dikena aku ngaga kelas online udah tu ila,” ku iya nerang.

Ku Rose nambah, menua sida enda jauh ari Pasar Pakan tang begunaka ungkus ti mayuh sereta perengka pengangkut ti manah dikena kuang kuit ninting hari.

“Aku ukai orang ti pemisi lalu aku enda ulih ke pasar ninting hari ditambahka agi enggau gaya hari ti suah ujan,” ku iya sebana.

Rose siku nembiak UPSI ti ngambi kus Pengajian Malaysia dengan Pendidikan, lalu taun tu mega nyadi taun penudi iya ba palan pelajar nya.

“Nyadi siku nembiak ba semester kepenudi, aku chukup begunaka internet ti manah dikena ngulihka penerang bekaul enggau projek taun akhir (FYP).

“Taja pia, penanggul nadai internet tu enda ngemuntangka aku ngulihka penerang ari sistem MyGuru, MyUPSI Portal enggau Pustaka UPSI,” ku iya.

Nya alai Rose ngarapka sebana iya nya tau datai sereta nerima perati piak ke bekaul ngambika ulih ngemuntangka pengawa nembiak ti amat begunaka penyambung internet ti manah.