KUCHING: Raban pemberita patut enda ibuh nangi tang mesti ulih napi ubah gaya baru pemacha ngagai pekara digital jeman diatu.
Ex-Editor Exsekutif Utusan Sarawak William Chan madahka jeman diatu raban pemberita diansak pekara digital ti ngasuh sekeda sida ngasaika diri diruga.
“Anang ngasaika diri diruga tang tapi semua ubah nya laban nya sebagi ari evolusyen dunya pemberita.
“Ubah runding kita laban kita endang dilatih nyadi siku pemberita ti madah pasal penerang enggau fakta ti betul, ukai nempa berita sengapa,” ku iya.
William madah munyi nya rambau Bengkel Licha Gerempung Pemberita Independent Kuching (Pewarta) di Palan Aum Borneo Kuching (BCCK) ditu, ensana.
Ku iya, internet nyadi pekara ti ngubah runding semua orang nyengkaum raban pemacha ngalih ari nguna chara lama ngulihka penerang ngagai chara baru.
“Suba chara lama (tradisional), tang diatu orang ngulihka berita muntang aja iya nya meda ba internet.
“Nya alai, kitai anang ngelakka diri empu diserang pekara digital tu lebuh ngereja pengawa.
“Nyadi siku pemberita aku nemu kita endang siku orang ti balat bejimat enggau enda mantaika penerang sengapa enti nadai fakta,” ku iya.
Kelimpah William, entara pemberita veteran ti bisi datai rambau bengkel nya Toman Mamora, James Ritchie enggau bala bukai.
