KUCHING: Dikena najamka pengelandik ngarang berita ba raban pemberita, dia sebengkah licha khas dikumbai ‘Penulisan Melangkaui Kebiasaan’ udah diatur ba Librari Nengeri Sarawak, ditu kemari.
Licha nya diatur Suara Sarawak enggau New Sarawak Tribune begulai enggau Centexs Commercial sereta Librari Nengeri Sarawak lalu digulu urung 60 pemberita, sub-editor enggau editor ari Suara Sarawak sereta New Sarawak Tribune.
Licha tu dikemujurka Pemenang Kajai 2007 (Anugerah Pemadu Tinggi Pemberita di Malaysia), Mohamad Shahren Mohamad Yusri nengah licha iya ke diberi nama “Kisah Disebalik Story Muka Depan”.
Tuai Pegawai Eksekutif (CEO) Suara Sarawak enggau New Sarawak Tribune ke mega Felo Kaunsil Profesor Menua Dr Jeniri Amir madah tuju licha nya diatur dikena ngenajamka pengelandik ngaga berita lebih agi ba raban pemberita.
“Dikena nyapai penyulut, kitai mesti beguro ari orang ke pemadu landik. Lalu nya kebuah kami ngangauka Shahren, laban kami ngasaika iya entara pemberita pemadu landik lalu bekunsi penemu enggau kitai peneleba sereta penemu iya,” ku iya.
Iya mega madah nyema pemberita deka nulis pekara nyelai ari selama, nyadi iya patut mejal diri ngelui ari pengulih sida.
“Nyema sekeda pekara nya digaga baka selama, nyadi kitai deka bulih asil ti baka selama tang kitai enggai baka nya,” ku iya.
Licha pengelama tiga jam nya dikena meri penerang ngagai pemberita dikena najamka pengelandik nulis enggau ngaga berita ke lebih manah sereta dikerinduka bala pemacha.
Kelimpah ari nya, licha nya mega meri penguntung ngagai sida ke bisi datai bekaul enggau chara nulis ke ulih nangkup peminta pemacha surat kaban kabar lebih agi beserimbai enggau Anugerah Kenyalang 2022 tu ila.
Berebak enggau nya, Shahren mega bekunsi peneleba iya maya gawa nyadi pemberita baka ni nyadi pemberita pansik ungkup kes ke bisi ba menua tu.
Shahren asal ari Kuching lalu mujur nempa nama ba Utusan Malaysia enggau Kosmo!.
Iya mega kala gawa nyadi Sekretari Berita ngagai ex- Menteri Pemansang Orang Indu, Anak Mit enggau Raban Bansa Datuk Seri Rohani Abdul Karim lalu diatu mangku pengawa nyadi Menijar Besai Palan Penyulut Teknikal (CENTEX) ditu.
Sama bisi datai Tuai Pegawai Operasyen SV News Sdn Bhd Mohd Sardon Zainal, Pemangku Tuai Pegawai Eksekutif Librari Nengeri Sarawak Japri Bujang Masli, Editor New Sarawak Tribune (NST) Aden Nagrace enggau Editor Eksekutif Rohana Wahed.
