MIRI: Kaban Gerempung Pemberita Utara Sarawak (NSJA) nerima elaun RM200 dikena beperesa pengerai ungkup taun 2020.
Kenu ku presiden iya, Andy Jong, pengawa meri elaun nya dipejalai kenyau 2016 lalu penyampau bayar maksimum RM100 ungkup ninting dua taun ditambah ngagai maksimum RM200 setaun bepun taun nyin kemari.
“Kaban gerempung semina mandangka resit rasmi maya beperesa pengerai ngagai NSJA lalu minta elaun penyampau RM200 ungkup siti resit.
“Elaun tu ulih ditukar enggau resit rasmi ari sebarang makmal tauka palam perubat ke endur beperesa pengerai,” ku iya madah nengah sebengkah penerang kemari.
Tandu iya, resit tauka invois ulih dipinta bepun 1 Januari nyentuk 31 Disember taun tu.
“Ungkup sida bebayar peresa pengerai ngelui RM200, sida dipinta mayar chaj tambah nya kediri,” ku Andy seraya meri terima kasih ngagai Menteri Perengka Pengangkut, Datuk Lee Kim Shin laban udah meri agih RM10,000 dikena ngemujurka elaun beperesa pengerai ungkup taun tu.
Berebak enggau nya, Kim Shin ke mega Adun Senadin bela meri tangkan ngagai bala pemberita sentang pengawa nyaga pengerai ukai pekara ke dianggap muntang.
“Pengawa nyadi pemberita ngembuan pemar kediri laban jam gawa nadai tentu.
“Nya alai, bala pemberita meseti beperesa pengerai belanggang tauka abis nadai setaun sekali dikena nentuka diri amat gerai,” ku iya.
Iya madah, pengawa meri bantu ari perintah nya kelai sukung ngagai NSJA ngambika kaban sid aulih beperesa pengerai.
Ditumbuh taun 1974, NSJA diatu ngembua lebih 100 iku kaban nyengkaum raban media ari surat kabar Melayu, Inggeris enggau China kelimpah media elektronik ke bepengkalan ba utara Sarawak.
