KUCHING: Sapit Kepala Menteri Datuk Amar Douglas Uggah Embas madah niang Datuk (Sarjan) Awang Raweng entara siku soldadu ti chukup sikar di Sarawak.

“Niang Awang ulih nyadika teladan ngagai rebak diatu laban iya siku soldadu ngembuan pemerani lebuh bejalaika tanggungpengawa.

“Nya alai, pemidang niang tu balat diasai genap iku rayat Sarawak kelebih agi ngagai komuniti Dayak,” ku iya.

Uggah mega nandu, pemidang niang Awang tu deka dikenang nyadi siku legenda Sarawak nyentuk jemah ila.

“Niang tu siku rayat Malaysia ti kala nerima Midul George Cross iya kelai bansa ke pemadu tinggi di Britain laban pemerani tudah niang baka udah diaku nengah London Gazette dibantai kena 20 November 1951.

“Niang tu mega tau nyadika lalau ngagai raban soldadu ke bukai sereta rayat Sarawak empu lebuh betapi enggau munsuh,” ku iya.

Nya alai, ketegal pemerani niang ninggalka jasa ti chukup besai ngagai semua rayat di nengeri tu.

Kelimpahnya, Uggah madah Awang deka disengai sereta dikubur begulai enggau raban bujang berani menua Sarawak ke bukai di Pendam Bujang Berani di Taman Budaya Kuching.

“Semua kitai di Sarawak bela meri penyinu enggau pemidang niang. Aku ngenataika penyinu ati ngagai sida niang sebilik,” ku Uggah.