Pemerani niang Roviezal meruan dikenang

MIRI: Pemerani niang Roviezal Robin, 20 deka meruang dikenang lebih agi dalam industri dagang temuai di nengeri tu.

Iya bebadi nyawa pengudah ke nguji nyelamatka siku temuai ari menua Belanda ti anyut ditabanka arus sungai.

Sebedau penusah nyadi iya bejalaika pengawa nyadi malin temuai diripotka lenyau ketegal penyadi bah tunggal di Gua Rusa Taman Negara Mulu ditu kena Hari Lima tu tadi.

Niang ke mega bansa Berawan mujur ditemu raban nyidi enggau nyelamat (SAR), pagi tadi.

Komander Operasyen, Opis Bomba enggau Penyah Penusah Marudi Maureen Sim Ah Lian madah, bangkai ditemu tetingkap ba atas batu karang enggau selepak kayu maya hari ketiga operasyen SAR dipejalai.

MUJUR DITEMU… Raban SAR mai bangkai Roviezal Robin, 20 pengudah ditemu tetingkap ba batu karang enggau selepak kayu, pagi tadi.

“Bangkai ditemu urung 500 meter ari pintu Gua Rusa, pukul 10 pagi,” ku iya dalam siti penerang, kemari.

Kenu ku Maureen, lelaki nya mujur ditemu empat iku kaban SAR nadai bebaju tauka kasut lalu semina ngena seluar enggau setukin aja.

“Penyauh ari endur nya penusah nyadi ngagai endur lelaki nya ditemu lebih kurang 800 meter.

“Nambahka nya, baju lelaki nya ditemu 400 meter ari endur penusah nya enggau penyauh baju nya ari iya mega 400 meter,” ku iya nerang silik.

Bangkai lelaki nya udah ditaban ngena bilun engkabang seraya datai ba Sepital Miri urung pukul 3.13 lemai, kemari.

Indai apai iya, Doris Batan, 42, enggau Robin Lagang, 53 mega nyenpulang bangkai anak sida lebuh dibai piak bomba ngagai sepital.

“Iya siku nembiak ti berani laban iya endang kakang deka nyelamatka Gerda Alida bini Peter Hans, 66, asal ari Belanda ,” ku Maureen.

Dulu ari nya, Roviezal mega nguji nyelamatka Gerda, tang anyut dibai arus deras pengudah mujur nyelamatka iya.

Peter ti lenyau rambau penusah nya ditemu raban SAR melepung ba sungai Gua Rusa urung pukul 6.40 pagi ensanus.

Operasyen SAR ngambi ngiga Roviezal udah nya diterus tang ditangguh ketegal ujan bangat pukul 3.22 lemai ensanus.

Bisi 68 iku nyereta dalam operasyen tu lalu disereta 12 kaban operasyen enggau pemesai kanan bomba, siku kaban polis, 20 staf Taman Negara Mulu dan enggau 35 peranak genturung pendiau.

SINU… Tubuh niang ditemu raban operasyen SAR sebedau dianjung ngena bilun engkabang ngagai Sepital Miri.