Pemerani Sarawak Renjer nadai endur mantah

SARATOK: Kaban Parlimen Santubong ke mega Ex- Sapit Menteri Dalam Menteri Datuk Seri Wan Junaidi kala mansutka Sarawak endang patut bisi raban pengelikun ke diri empu baka Sarawak Renjer bejalaika pengawa nyaga adan entara menua.

“Nitihka Pekara 5 dalam Sempekat Malaysia 1963 (MA63), Sarawak diberi kuasa ngatur pengawa bekaul orang ti pansut tauka tama ngagai menua tu,”Ku iya.

Penemu Wan Junaidi disukung sekeda peranak menua tu bekaul enggau langgur penemu nya.

Kennet Majit Angih

“Penemu ngidupka baru raban Sarawak Renjer endang langgur penemu ke manah laban tu kelai pemerani kitai Iban kelia sereta pemanah kaul enggau soldadu British.”

Alexander Sela

“Raban Sarawak Renjer kelia endang ngembuan pemerani enggau pengelandik ke nadai dikembuan unit soldadu bukai. Sida tu ulih nyadi unit khas kelimpah ari VAT69, PASKAL, PASKAU. Reti nya sida ulih nguasa semua pengelandik unit bukai.”

Assom Lutek

“Perambu tu sigi manah laban tau nyendia peluang gawa ngagai raban nembiak kitai Iban. Pia mega awakka nengeri tu enda bangat bepanggai ngagai soldadu ari Semenanjung Malaysia. Sema jaku enti kitai badu sebilik enggau Malaysia…kitai udah bisi soldadu kediri empu.”

Lawrence Temba

“Manah amat penemu nya, aku sigi setuju laban Sarawak Renjer tu endang soldadu khas kitai Dayak. Kitai enda nemu penyadi dudi hari lalu tu ulih nyadika penabat kitai.”