Pemeri Naim ngelempung tating penusah

KUCHING: Serikat Gerup Naim Berhad udah nyuaka pemeri RM250,000 ngagai 25 gerempung pengasih ba Kuching, Miri enggau Bintulu ngambi ngelempung tating penusah komuniti ti tusah ketegal pandemik Covid-19.
Padi Chan ngarika Carnation Club bela meri terima kasih ngagai serikat Naim berekat ari pemeri nya.
“Kami seruran betatika nasip indai tunggal maya pandemik tu laban kami tu sebuah organisasyen ti mantu enggau nyukung raban tu.
“Pia mega, kami nadai nyangka serikat korporat baka tu deka mantu kami kelebih agi maya gaya ekonomi enda tegap.
“Kami meri terima kasih ke penyiru serikat tu nentuka pengelantang indai tunggal seruran dijaga.
“Kami ngarapka mayuh agi serikat korporat bukai nunda pemanah ulah kita tu,” ku Padi Chan.
Nangkan nya, Presiden Serakup Apai Indai Anak Mit Berkeperluan Khas (PIKABAT) Zaidi Ahmad madahka serikat Naim nya sebuah organisasyen ti dikelala suah bejalaika aktiviti mantu komuniti.
Ku iya, sida ulih nyendiaka program pemansang modal mensia ungkup orang nyelai pendiau besai tuai asil pemeri ti udah disua serikat nya berapa taun ke udah.
“Nya kebuah, kami meri besai terima kasih laban udah nyuaka bantu ngelama tu laban bantu nya udah nyaup kami lebuh nyendiaka program latih enggau bejalaika kus nambahka pengelandik raban tu baka kedai roti enggau endur betuchi ba kedai Ong Tiang Swee dudi hari.
“Gerempung tu mega inisiatif kami ngansah pengelandik ngagai raban bekaul ngambi ulih ngidupka diri,” terang Zaidi.
Nambahka nya, Madzrol Abang ari Palan Nyaga Orang Tuai Bintulu (PPWE) madahka pemeri nya deka negapka agi program ngaul orang tuai.
Pemeri ti diberi terus nya sebagi ari kimpin pengasih beserimbai enggau ngintu taun ke-25 Gerup ‘Naim Thanks You’ ti dilanchar ba bulan Disember 2019.
Nengah kimpin nya, Naim besemaya deka nyuaka pemeri RM250 ungkup tiap rega tanah ti dijual ba taun 2020 ke ditiki abis nadai RM250,000.
Entara gerempung pengasih di baruh kimpin tu iya nya Serakup Anak Sakit Raya (SOS Kids), Serakup Apai Indai Ti Ngembuan Anak Mit Tachat Sarawak (PIBAKAT), Kaunsil Pengintu Pengelantang Anak Patu Balu Sarawak (PERYATIM), Carnation Club of Kuching enggau Samarahan, Kuching Autistic Association enggau Serakup Orang Bengal Sarawak.
Pia mega, Serakup Orang Buta Sarawak, Serakup Ngintu Pengelantang Anak Mit Terencat Akal (PERKATA), Serakup Orang Tachat Sarawak, Serakup Indai Tunggal Sarawak, Rumah Cheshire Sarawak, Rumah Anak Mit Salvation Army, Serakup Anak Mit Riman Sarawak enggau Serakup Cerebral Palsy (Kuching enggau Samarahan) mega di baruh kimpin tu.
PERYATIM Miri, Miri Home for the Aged, Palliative Care Association of Miri, Miri Autistic Association, Serakup Indai Tunggal Sarawak Pampang Miri (PITSACM), MRCS Sunflower Center, Miri, Serakup Apai Indai Ngembuan Anak Mit Nyelai Pendiau Miri (PIBAKIS), Palan Ngibun Anak Mit Methodist Miri, Serakup Rayat Prihatin enggau Apai Indai Ngembuan Anak Tachat Bintulu, PERYATIM Bintulu enggau Palan Nyaga Orang Tuai Bintulu (PPWE) mega masuk dalam kimpin tu.