ARTIKEL

Pemerinsa idup nyadi peransang Dr Modin Ambau

Facebook
Twitter
LinkedIn
WhatsApp
Telegram

PEMERINSA enggau penyeranta agi mit semampai nyadi peransang deka nampung pelajar nyentuk tikas tinggi.

Ba diri empu ku Dr Modin Ambau, endang nadai chara bukai ulih ngemansangka diri enti enda ari pengawa belajar.

Iya nyemetak madah, pemujur nampung pelajar datai ba tikas PhD mega tau nyadi peransang ngagai bala bakih, anak enggau bansa diri.

“Aku anak orang merinsa, kami tiga iku diri menyadi endang bepanggai ba pengasih enggau penyayau indai.

“Indai aja ngidup enggau nyengulaka kami semenyadi pengudah apai aku midang maya kami agi mit.

“Indai semina ngereja pengawa bumai, bekebun sereta gawa ba kebun sawit SALCRA dikena ngiga anak belanja nyengula ke kami semenyadi.

“Duit endang suntuk belama dikena nurun ke sekula, ari nya tadi aku meransang ati diri deka pandai sekula datai ba tikas tinggi dikena ngubah nasip enggau pengidup kami sebilik.

“Kebuah pia laban aku pechaya, semina pelajar aja ulih ngubah nasip enggau pengidup kitai,” ku iya nusui peneleba pengidup diri.

PELAJAR TIKAS TINGGI

Dr Modin asal ari San Semanju, Engkilili ke gawa nyadi Pemelihara Hutan Kanan ba Opis Kampung Sarawak (JHS) madahka diri endang lama udah bisi niat nampung pelajar ngagai tikas PhD.

Ku Dr Modin, orang ti balat meransang iya nampung pelajar tikas Pd Dnya diri empu sereta pengelicha Prof Madya Dr. Pakhriazad Hassan Zaki.

“Aku endang lama udah bisi niat deka nampung pelajar tikas PhD laban ari mit nyentuk udah besai, runding aku semina siti iya nya pelajar aja ulih ngubah pendiau pengidup kitai nyadi orang ti lebih menyana.

“Aku mega mutus ati nampung pelajar PhD pengudah diumbuk siku pengelicha maya kami duai begulai ngirup kopi.

“Nyau berunding ga aku laban pengawa tu endang napi bemacham pemar ari sukut duit belanja, awak enggau pengelelak.

“Kelebih agi timpuh belajar laban ke kereja. Siang fokus pengawa opis, bos enggau kereja.

“Ba rumah bisi anak ke agi mit, meseti fokus ga ngagai bini enggau anak.
“Nya kebuah, aku naka ulih ngiga awak nyelepak endur nulis tesis. Nya meh penguji nampung pelajar.

“Tang teju ke dulu semua penguji nya laban tu endang juluk lama udah diining aku,” terang iya.

Lebuh ditanya senentang resia teulihka pemujur, Dr Modin nyemetak madah, nembiak meseti bisi pengeran enggau pengingin ti tinggi deka tembu belajar.

Ukai semina nya aja, iya madahka sukung ari bini anak, diri sebilik enggau bala bakih mega beguna endar.

Kelimpah ari nya, kitai meseti manah sereta mentas enggau orang bukai lalu ingat ke Petara.

PAJAKKA SINGKANG

Nampung randau ke dalam agi, Dr Modin suah meransang rebak biak anang sesekali mudah mantul ati ba pengawa sekula.

“Besekula sigi pedis, nuan lenyau duit, awak sereta lelaki.

“Sigi mayuh penguji diasaika nuan maya agi besekula tauka belajar. Tang pechaya meh, nuan enda rugi bulih bemacham penemu ari besekula.

“Nampung pelajar tau ngasuh penemu nuan dalam, meretika bemacham pekara baru enggau jauh tinjau penemu.

“Baka diri empu udah datai ba adan, endang tepantup ati, gaga sereta temegah.

“Gaga meda tuchum manis sereta mua indai tampak gaga pengudah meda aku udah tembu belajar ba tikas tinggi.

“Pejalai aku nyangka mayuh pengurang enggau penimpang enti nadai sukung ari indai, bini enggau anak sereta kami sebilik.

“Tu endang tepa ungkup indai laban udah bekenanas ngereja bemacham pengawa sereta ngiga anak belanja ngagai kami semenyadi laban deka meda kami idup senang sereta pandai besekula.

“Nya kebuah, bala anak enggau menyadi, anang ngelebu apai indai ti udah bebendar ngiga belanja dikena nyengulaka kitai.

“Beri sida pengaga meda kita mujur ba genap pengawa dikereja,” ku iya ti ngambi kus Pengurusan Hutan dan Sains Ekosistem sereta ngaga thesis pasal Impact Of Land Use Change To Socioeconomic Development Of Penan Community in Murum, Belaga, Kapit, Sarawak, Malaysia.

Ditanya sekali ke bisi perambu nyadi pengelicha, Dr Modin madah, naka diatu iya agi gawa ba Opis Kampung Sarawak tang nyema bisi peluang iya deka nguji laban nyadi pengelicha mega juluk ati iya.

Ba ujung randau, Dr Modin mega ngelalau apai indai semampai sedia nyukung aktiviti pelajar anak sida lalu meseti bisi duit simpan ungkup anak nampung pelajar.

TIANG SUKUNG… Dr Modin begambar enggau indai, bini enggau anak sereta sida sebilik.
DATAI BA ADAN… Dr Modin temegah juluk nyadi nyata pengudah nembuka pelajar tikas PhD.

LAIN-LAIN BERITA

Bakih strategik KGC deka ditambah

SARIKEI: Opis Menteri Pemansang Indu, Nembiak Mit enggau Pengelantang Komuniti Sarawak (KPWK) benung chakah ngatur pengawa sida ngambi mayuh agi premis nerima Kenyalang Gold Card

TYT Sarawak bulih gelar Pehin Sri

KUCHING: Tuai Pemegai Menua (TYT) Nengeri Sarawak, Tun Dr. Wan Junaidi Tuanku Jaafar udah nerima Darjah Utama Yang Amat Mulia Satria Bintang Sarawak (S.B.S) ke

KDJA ngerami 200 pengemeran media malam tadi

KUCHING: Lebih 200 iku pengemeran media dirami nyerumba Pengerami Makai Lemai Taun Baru China Gerempung Pemberita Bagi Menua Kuching (KDJA) malam tadi. Sekeda program bisi

Sistem belanja seikas menua maju

MIRI: Perintah Sarawak benung nungkap pengawa numbuhka sistem belanja ti seikas enggau menua ti udah maju ba rantau tu. Premier Sarawak Datuk Patinggi Tan Sri

BERITA TERBARU