Pemerinsa kelia nyadi peransang mantu nembiak seranta

ENTIKONG: Ngenang diri kala merinsa nadai utai dikena besekula ngasuh ex-pengajar Lawrance Clement Ahsay mupu belanja ari mensia mayuh mantu nembiak seranta.

Ku iya, pemerinsa kala diasai engka mega ditapi bala nembiak ti begunaka bantu ba sebuah genturung pendiau dikumbai Desa Suruh Tembawang, Entikong, Kalimantan Barat.

“Dibai ati sinu sereta kasih, aku ngeringka semengat diri minta pengasih mensia mayuh bela besaup mantu bala nembiak ti deka maju ba sekula.

“Kitai mega bela nemu baka ni gaya ekonomi bala menyadi kitai ke diau ba semua sepiak nyin bepanggai ba pengawa bumai betaun enggau bekebun aja.

“Nya alai aku keran amat mantu sida lalu juluk ati aku mujur dijapai ari saup semua kita,” ku Lawrance lebuh dirandau Suara Sarawak.

Lawrance mulaika pengingat diri dalam taun 60-an suba lebuh besekula ba Sekula Primari (SK) St Leo di Kampung Serasot, Bau ke alai iya nadai kasut, nadai kantung enggau nadai uniform dikena.

Iya madah, lebuh nurun ke sekula jauh nemu utai ke bekasut tauka beselipar, nadai ngema kantung sereta nadai ngerasuk uniform sekula.

“Agi ingat endar lebuh aya Mathew Jikeh meri aku pensil nyura ti keterubah. Chukup gaga asai ati maya nya, nadai ulih ditusi ngena leka jaku.

“Ati mega berasai ransing agi udah nerima pemeri nya lalu aku beterima kasih ke peransang sereta meri puji ngagai pemanah aya Mathew,” ku iya ngelansa.

Nya alai iya ngarapka bantu diberi tu ulih meri peransang ngagai sida ransing agi belajar kelimpah ulih ngelempungka tating belanja bala apai indai nyekulaka anak.

Ngena awak tu, Lawrance meri besai terima kasih ngagai bala menyadi, bala bakih enggau bala kaban Dayak Bukit Kelingkang (DBK) sereta orang ngatika diri laban udah gerah jari ngemujurka tuju pengawa iya sekali tu.

“Terima kasih besai ke sukung enggau tulung diberi kita ngagai aku, jaku peransang ngasuh pengawa kitai tu mujur.

“Semina tuhan aja ulih malas pemanah budi lalu merekat semua pengawa dikereja kitai,” ku iya madahka pengelantang ati diri.

Kena Hari Minggu tu tadi, Lawrance disempulang bala kaban DBK, Insol Harry enggau bala bukai nyuaka bantu penyampau RM1,000 ngagai pengari Raban Nembiak Katolik Komcab Sanggau, Hubertus Vinsencius Wake ba Garis Entara Menua Malaysia-Indonesia Entikong ditu.

Bantu nya ungkup Servis Rama enggau Bank Kasut Renggat Kepenudi dipejalai Raban Nembiak Katolik Komcab Sanggau ke alai sida meri kasut, kantung enggau uniform sekula ngagai nembiak seranta.

Suara Sarawak