Pemerkasa inisiatif badas perintah besai

KUCHING: Menteri Muda Perambu Mengeri, Pengatur Tanah enggau Rampa Menua, Datu Len Talif Salleh nerima manah Program Strategik Negapka Rayat enggau Ekonomi (Pemerkasa) ti dibantaika Menteri Besai Tan Sri Muhyiddin Yasin kena Hari Tiga tu tadi.

Ku iya, Pemerkasa nya inisiatif perintah ngambi mantu rayat sereta nentuka dagang nadai kusut.

“Bemacham inisiatif dipejalai dalam Pemerkasa baka bantu putus pengawa enggau bantu sekali terima penyampau RM500 ngagai raban B40 enggau nambahka RM500 ngagai penerima BPR bepenatai pemisi RM1,000 enggau kurang ari nya kelimpah nambahka peneras arus penyambung,” ku iya nerang.

Len mega madah bisi lima pekara besai dikemerat nengah Pemerkasa enggau 20 inisiatif mulaika pemanah ekonomi taun tu ngena agih belanja penyampau RM20 bilion.

Ku iya, batang tuju inisiatif nya dikena nagang pengerekai Covid-19, mulaika pemanah ekonomi menua, negapka pemansang menua, bejalaika agenda pemansang mungkur wilayah enggau komuniti sereta nyungkak ekonomi menua.

Nya alai ku Len, ejensi perintah kelebih agi orang gawa perintah mesti nyadi orang tengah pasal polisi tu lalu dikearap semua semua inisiatif tu deka meri pemaik ngagai raban ti tusah.

“Perintah mega nyendiaka agih belanja RM30 juta dikena mantu pedagang indu bedagang nengah online baka Kimpin e-Dagang PKS, PKS Mikro enggau Program Shop Malaysia Online.

“Palan Servis Nembiak ditu mega ulih mantu sida ke bisi ati deka minta agih belanja,” terang Len.

Suara Sarawak