Pemerkasa: Projek mit dirumban

KUCHING: Inisiatif Program Strategik Nyaga Rayat enggau Ekonomi (Pemerkasa) beguna amat dikena ngintu pengelantang rayat ngambi mulaika baru pemanah ekonomi enggau pengawa dagang.

Menteri Kanan Kereja Raya Datuk Sri Fadillah Yusof madahka Opis Menteri Kereja Raya (KKR) beratika inisiaitif nya engkeman dipejalai diatu maya menua ba renggat kelima dalam Strategi Pelin Penuh Mulaika Pemanah Ekonomi.

“Nya alai, KKR mega udah nambahka agih belanja tambah RM2.5 bilion dikena nyungkak baru ekonomi kunteriktor mit nengah inisiatif Pemerkasa tu.

“Pia mega, perintah setuju nambahka agih belanja projek mit ngagai RM5 bilion ti deka pulaika pemanah ngagai kunteriktor G1-G4 ti napi penusah ketegal pandemik Covid-19,” ku iya nerang, ditu kemari.

Ku iya, entara projek mit ngagai kunteriktor kelas G1 ngagai G4 tu iya nya nyeleti infrastruktur ti rusak ketegal penusah bah, nyeleti jalai enggau program ameniti sosial.

Pia mega ku iya, projek nyeleti genturung pendiau berstrata nyengkaum miki lif ba genturung pendiau perintah sereta nirika kedai ba sitak Kaunsil Kandang Menua (PBT).

Nambahka nya ku iya, perintah mega deka ngemuntangka pengawa ngulihka tinder dikena ngerumban pejalai projek kelimpah projek mit ungkup kunteriktor menua ngagai nengeri enggau pelilih nya.

Terang Fadillah, Perintah Besai mega deka ngeranchakka projek mit dikena mantu rayat maya napi penusah diatu enggau nyungkak ekonomi menua.

Iya madahka inisiatif tu mega dikena ngelempung tating belanja bala kunteriktor mit, nyungkak baru ekonomi ari pengawa berumah enggau nyendiaka pengawa puang.

Kelimpah ari nya ku iya, inisiatif nya meri peluang ngagai kunteriktor mit ngaul diri dalam industri pengawa berumah kelebih agi nyeleti infrastruktur lalu nentuka rayat bela bulih pemaik ari projek pemansang ti disediaka perintah.

Suara Sarawak