Pemesai guna tajau ba Adat Pemati

Tusun ketiga…

NAMPUNG kenang kitai Iban pasal adat basa ngintu pemati enggau penyiru ngagai sida ke udah midang enggau bala sida sebilik ti puang ditinggalka niang.

Nicholas J. Ugik udah minta tusi sida ke tuai bekaul adat pemati raban bansa Iban ba Bagi Menua Ulu Layar, Betong lalu ngempung semua penemu nya ngambi ulih nampung genap tusun pemati tu ngagai semua kitai.

Ku iya, nitihka pansik Chemalin Usop (2011), atur ngintu pemati nitihka jerita tuai menya bepun ari aki ini kitai benama Serapuh.

Ba tubuh Serapuh kelia, enti mensia bisi parai, bangkai sida deka dibuai ngapa baka ti muai bangkai ukui, bangkai manuk lalu ditikau sebelah tanah enggau ngagai babas.

Pia mega, pengawa ngintu pemati tu nadai ngena adat enggau lebas dataika sida Serapuh serumah parai bejurut baka siku parai tengahari, siku parai muakka lemai.

Bisi sekali, Serapuh bisi ninga orang ngangauka iya ari ujung tanju, nanya nama kebuah pendiau sida serumah dipeda balat runggu enggau sinu.

Dia Serapuh nyaut tanya nyawa ke bejaku nya madahka sida serumah nyau deka ninting hari dituntung penusah rabat.

Udah nya, iya lalu nanya ngagai Serapuh chara sida ngintu pemati tang Serapuh lama enda nimbal laban nadai kala ninga adat ngintu pemati nya.

Nya alai Serapuh semina madahka sida muai bangkai orang ke udah nadai nya sebelah tanah.

Pengudah ninga chara sida Serapuh ngintu bangkai ba rumah nya, orang nya tadi lalu madahka chara sida Serapuh tu salah ngujungka sida nyau betampung ulit.

Pia mega, orang nya lalu mesan Serapuh sentang adat ngintu pemati baka ti dikena kitai Iban ngintu pemati.

Adat pemati kitai Iban dikumbai Pesan Puntang Raja laban orang ke bejaku enggau Serapuh nya tadi benama Puntang Raja ti dianjung Petara Sempulang Gana.

BESAI GUNA… Tajau tu entara kereban pemadu besai guna ba pengidup kitai Iban ba rumah panjai kelebih agi bekaul enggau adat.

ADAT BASA

Nangkan nya, kitai Iban ngembuan adat enggau penyiru lebuh ngenang basa enggau penusah bala diri sebilik ke udah ditinggalka niang.

Pia mega, niang diintu ngena chara rabat disempulang ngena baya laban kitai Iban pechaya bisi dunya bukai pengudah mati dikumbai dunya sebayan.

Nitihka penerang ditulis Sultive (1989), bansa Iban tu entara bansa ti ngembuan atur enggau adat lebuh ngereja semua pengawa sekalika pengawa bumai, nirika gawai, ngintu pemati sereta ke bukai.

Bansa Iban mega ngembuan adat ba rumah panjai dikumbai Tusun Tunggu lalu adat tu mih dikena megai tampuk adat ngambi nyadi malin enggau lalau ba pengidup kitai.

Ba pengawa rabat, kitai Iban ngena adat baka ngulit dikena bebasaka timpuh ngulitka pemati, mantaika penyinu ati nuju bala niang sebilik ti udah ditinggang penusah.

Ba menua Saribas kelia, timpuh ulit nya manggai tiga bulan lalu sebarang pengerami enda tau diatur ba rumah panjai orang ti ditinggang penusah rabat tu.

Nambahka nya, balu enggau sida sebilik ti ditinggang penusah mega enda tau berias, nganta tauka ngulu pengeramii di bisi diatur orang ari ulu enggau ari ili rumah panjai sida.

Barang sapa ti ngelanggar atur tu deka ditimbang ngena penyampau adat ti udah ditetapka maya berandauka adat ba malam nyengai bebala mayuh.

Lebuh berandauka adat nya, bala temuai enggau kaban belayan endang udah nudukka diri ba rumah nambi sama ninga lalu ngingatka adat pemati ti udah disebut tuai adat nya.

BEJAKUKA ADAT… Datuk Douglas Sullang benung meri jaku simpul senentang adat pemati ke udah dibacha Temenggong Dato Bernard Agan maya pemati niang Andria Zanoria Peter.

TAJAU KE TANDA PENGERAJA

Lebuh bekenangka jerita lama, pengidup kitai Iban endang bisi kaul enggau chara bulih tajau.

Nitihka pansik Benedict Sandin (1980), kitai Iban bulih tajau ari nurun ngayau enggau bejalai ngagai menua bukai enggau tajau tu nyadi tanda pangkat tauka status kitai ba rumah panjai.

Ku Nicholas, Benedict Sandin mega bisi madahka ukum adat Iban diletak ba tajau kelimpah ari mata duit.

Pengabis baruh baka siti jabir tauka besai mimit siti panding tang diatu, penyampau ukum diletak ba siti jabir nyau nyadi RM1 enggau siti panding dipulai nyadi RM2.

Ku Nicholas ngelansa, iya kala ngerandau siku orang ti landik pasal adat kitai Iban iya nya niang Tunggau Anak Mula.

Lebuh ngerandau iya, Tunggau madahka adat basa pemati Iban Saribas tu endang diletak ba tajau.

Tang ku iya, pemesai tauka tikas adat entara menua dalam Saribas nya enda sebaka laban nitihka atur ari Penghulu Ulin kelia.

Penghulu Ulin bisi nanya bala ketuai raban bansa ari Rimbas, Paku, Ulu Layar, Spak enggau Ili Layar pasal pengulih bala rayat sida begigaka tajau.

Nyadi, saut bala ketuai tu enda sebaka laban bisi madahka bala rayat udah bulih tajau rusa, bisi bulih sergiu, bisi bulih menaga sereta bisi mega semina bulih jabir tauka alas.

Nitihka Tunggay Mula (2016), tikas adat entara menua nya enda sebaka laban bepelasarka pengulih tajau orang kelia.

Berindik ari nya, Penghulu Ulin lalu netapka atur adat basa pemati enda sebaka baka bala ari Rimbas enggau Layar Ili ulih mai adat ke besai agi, muakka ai Spak baruh agi ari Layar Ili.

Udah nya tadi, ari Nanga Spak ngagai Ulu Layar ulih mai adat baruh agi ari Batang Spak enggau tikas adat Batang Paku mega baruh agi ari ba Layar.

Terang Nicholas, kebuah adat nya enda sebaka laban orang kelia endang ngena tajau lalu enda dipulai ngagai mata duit baka kitai diatu. Nya alai, enti nadai penatai pemisi tetap, sigi pedis amat bebelika tajau menya.

Nya kebuah, kitai suah ninga enti orang Layar Ili, adat pemati iya ulih mai siti alas iya nya mata duit RM4, orang ari Spak Ulu semina ulih mai tiga jabir tauka RM3.

Adap menua Paku, adat pemati sida semina siti jabir pulai ngagai mata duit RM1 tauka siti panding ditukar ngagai RM2.

Adat tu ukai digaga siku aja tang ari pengawa baum enggau penemu Tuai Adat kelebih agi bala Tuai Rumah sereta sida ti beserimbai pendiau enggau orang ti udah parai tadi.

Nitihka kenang tuai, adat basa pemati tu ditetapka setipak enggau gaya pengidup iya ba dunya lalu enda tau diletak kelalu besai tauka kelalu mit laban nya tau meri penanggul ngagai sida niang sebilik ke agi idup.

Enti niang nya diletak adat kelalu besai ukai nitihka gaya pengidup iya ba dunya tu, adat nya tau ngasuh pengeraja sida sebilik ke agi idup nya ambis lengis enggau dituntung penusah bukai.

KELAI PENYIRU… Temenggong Dato Bernard Agan, Tuai Raban Bansa Iban Bagi Menua Kuching, benung macha adat pemati niang Andria Zanoria Peter, Tuai Opis FELCRA Sabah enggau Sarawak.

GUNA TAJAU

Berindik ari nya, adat basa pemati digaga enggau manah sereta bejimat ngambika adat nya enda nanggul batang pengidup orang ti ditinggang penusah rabat tu.

Ungkup penerang semua, adat basa pemati ke bisi mai jabir, panding tauka alas enggau rega nya ngembuan besai guna enti dipulai ngagai mata duit.

Keterubah, orang ti ngelanggar atur tauka penti dalam timpuh ulit deka ditunggu ngena penyampau adat basa ke dibai niang mati.

Ambika banding, enti niang mati mai tiga jabir, reti iya orang nya deka kena tunggu enggau dipinta mayar RM3 ngagai orang ti bempu penusah tu.

Guna kedua iya nya dikena lemambang tauka tukang sabak netapka upah enggau atur pengawa sabak.

Ambika banding, enti niang nya siku orang ti beberita bulih utai, ngembuan pengelandik jari enggau beberita, iya deka mai adat basa nya abis kurang siti alas.

Nya kebuah lelambang ti nyadaka sabak bebuah bisi bida ari sida ke nyabakka orang udah nadai mai adat baruh ari alas.

Enti mai alas tu, lemambakng ti nyabak nya enda tau enda digaga ranyai ba tisi sapat laban leka sabak iya nyerara buah ranyai ti disempama baka pengaya enggau pengeraja.

Guna ketiga ti diletak bala Tuai Adat nya bisi guna maya pengawa ngambi entabalu laki tauka bini niang.

Enti adat niang naka tiga jabir, adat entabalu nya mega diambi ngena tiga jabir.

Guna kepenudi iya nya ba renggat pengawa besai agi baka merantu semengat niang ba sebengkah gawai besai Iban dikumbai Gawai Antu.

Pengawa ke dulu dikereja iya nya beranyam sebedau nudukka gawai besai tu.

Tukang anyam ti diinjau orang megai pengawa tu deka nganyam perengka sebayan baka ranggung garung nitihka adat basa pemati ke diletakka orang ba niang.

Pemesai adat basa pemati sida ke udah midang nya bisi bida ngujungka perengka ti dianyam nya enda sebaka.

Betampung minggu baru…