Pemesai reti tusut ba kaul bansa Iban

RABAN bansa Iban balat beratka tiris pantis peturun diri lalu pekara tu mai reti chukup besai ba mayuh sukut pengidup sida.

Betusut, iya nya sebagi ari chara nyidi tiris pantis tauka kaul enggau pangan diri kelebih agi ba kaul baka serak petunggal tauka kaban belayan.

Nya kebuah, aki ini tauka apai indai kitai lebuh betemu enggau bala diri sigi alu betusut ngambika ngelala pangkat diri empu lalu kaul dikumbai kitai bebala.

NYELIAH JADI MALI

Pengawa betusut tu agi besai reti ba pengidup kitai diatu kelebih agi lebuh jadi melaki bini ngambika orang ti deka jadi bini tauka laki nya semina bala jauh.

Betusut tu mega ngambika kitai ngelala kaban belayan enggau aki ini kitai kelia.

Lebuh aku nemuai ngagai sebuah rumah panjai ke enda kala dilawa aku suba, bala temuai enggau bala ba rumah panjai nya deka betusut.

Sida betusut lalu nyidi lima peturun tauka lebih ari nya nyangka aki ini sida kelia bisi kaul enggau pangan diri.

Kebuah pia laban sida deka nemu diri sebala tauka enda ba tusut ari aki ini sida kelia.

Enti suba, bansa Iban suah ngasuh anak sida jadi enggau bala jauh ngambika enda jadi mali ti dikumbai penti pemali bansa kitai.

NYIDI PETURUN… Siku pegari ari sepiak indu enggau lelaki deka betusut ba pengerami melah pinang.

Nya kebuah Iban Saribas enggau Krian enda tau enda betusut lebuh bisi pengerami melah pinang.

Pengawa betusut tu ulih nyeliahka sida ke jadi tu enda jadi mali baka pangkat aya jadi enggau pangkat anak laban tu mih dikumbai jadi mali.

Mayuh orang jadi enggau petunggal ketiga tauka empat sida ke alai bisi kaul semak enggau pangan diri.

Tang ubah dunya ke makin moden diatu ngujungka pekara nya majak lenyau laban pemansang pelajar enggau arus pemansang.

Nya alai, nyangka mimit aja sida ke tuai landik betusut sentang peturun aki ini kitai kelia.

Apai indai bansa Iban engka ulih ngelala tiga tauka empat serak peturun sida aja.

Pia mega raban nembiak rebak baru kelebih agi sida ti besai lalu diau ba mengeri engka enda ngelala nama aki ini sida.

NYIDI PENYEMAK KAUL

Ba pengerami melah pinang aku dalam taun 1984, mayuh bala ba kuarters perintah di Sibu tekenyit lebuh mendingka tusut entara kami duai melaki bini.

Berindik ari nya dua iku ti landik betusut ari Krian enggau Saribas dikangau ngambi nyidi aki ini aku enggau bini aku benama JK ti biak 10 taun.

Aya aku benama Mathew Banyin Nyaru (petunggal kedua apai enggau petunggal ketiga indai) ngarika piak lelaki ari Kedap, Saratok seraya Penghulu Ganja ngarika piak indu ari Betong.

Dua pengari ti udah betusut (diatu udah parai) nyidi penyemak kaul JK enggau aku petunggai kelima sepiak apai enggau petunggal kesemilan sepiak indai.

Entara ketuai dipebasa ba Rajang ti bisi ngulu pengerami melah pinang tu iya nya Senator Joseph Unting, Joseph Kudi (pengari Ngemah), Datuk Ignatius Angking, Datuk Temenggong Sandah ari Durin enggau bala pemesai perintah.

Mayuh bala sida ti datai ba pengerami melah pinang aku berasai temegah enggau pengelandik Banyin enggau Ganja betusut kelimpah seduai bela enda ngena bup nyadika malin nerangka tusut kami duai melaki bini.

PETURUN SENGALANG BURUNG

NYELIAH JADI MALI… Pengawa betusut tu beguna amat ngambi enda jadi mali kelimpah ngelanggar penti pemali bansa kitai.

Ungkup guna enggau penemu diri empu, aku udah ngempung mayuh penerang bekaul tusut kenyau ari 30 taun ke udah.

Sebengkah penerang ke manah amat digiga aku pengudah macha bemacham penerang madahka bala aki ini bansa Iban ulih nyidi peturun sida ari Sengalang Burung tauka dikumbai Aki Lang.

Engka bisi penerang ti besibil bekaul pengawa betusut tu tang tu mih pekara ke tau ngasuh kitai tekenyit.

Ambika banding, nitihka penerang ari Vinson H. Sulive Jr dalam bup iya, Tun Jugah ari Sarawak madahka Temenggong Koh Jubang nya Ketuai Iban Keterubah enggau peturun ke-21 Aki Lang.

Nya kebuah, anak iya benama Datuk Kenneth Kanyan, Mindun enggau Sagura nya peturun ke-22.

Taja pia, lebuh nyidi bekaul peturun tu aku mujur tetemuka aku peturun ke-23 Sengalang Burung lalu sama mega enggau anak Dunging Gunggu (penengkebang urup Iban ti tebilang).

Nambahka nya, peturun ini kami mega bisi kaul enggau Sengalang Burung lebuh ini kami nya bini iya benama Endu Sudan.

Engka apai indai muai tauka ngelaungka pengawa betusut lebuh anak sida jadi melaki bini laban sida enda landik betusut.

Tang bisi pemanah iya enda ngereja pengawa betusut tu ngambi nyeliahka anak sida bisi kaul enggau pangan diri laban nyangka anak sida ti deka jadi melaki bini nya bisi kaul.

Taja pia, pengawa betusut tu kala nyadi lebuh orang ti deka jadi melaki bini nya bisi kaul enggau pangan diri dalam komuniti Iban kelebih agi jeman menua dipegai Brooke enggau jeman ngayau.

Tuju aku nerangka pekara tu laban deka madahka kita semua sentang kitai bansa Iban tu peturun Sengalang Burung tu siku Petara ti dipebasa.

Suara Sarawak