Pemesai senior JPN didawa nyual tingki

GEORGETOWN: Kes siku pemesai senior ba Opis Pengerejista Bansa (JPN) dibai ke Kort Sesyen tadi laban didawa bekaul enggau sindiket nyual tingki ngagai peranak menua China.

Nitih ku penerang, lelaki beumur 40-an nya sebedau tu ditan di baruh Akta Kesalahan Keselamatan (Langkah-Langkah Khas) 2012 (SOSMA) ti dituduh ngereja sekeda penyalah.

Sebedau tu, berita madahka sekeda orang nyengkaum pemesai gawa perintah ditan polis ketegal ditemu nyual tingki ngagai rayat China ba nengeri tu ditemu apin lama ke udah.

Kelimpah ari nya, operasyen khas dilanchar minggu nyin tadi mega ngetan siku kaban enggau pemesai opis sama ba Putrajaya di baruh akta sama.

Operasyen nya dipejalai berindik ari ripot digaga kaban Opis Imigresyen Malaysia (JIM) nengeri ti tetemuka bisi indu rayat China beumur entara 25 ngagai 30 taun ngembuan tingki nguji ngaga pasport Malaysia.

Taja pia, status peranak menua indu nya ngasuh alit ati laban enda nemu Jaku Melayu sebedau JIM nengeri ngaga ripot polis.

Berindik ari ripot nya, polis ngelancharka operasyen ngenyit lalu mujur ngetan sekeda orang dipelaba udah nyual lebih enam iti tingki sah berega RM350,000.

CHUNTO TINGKI