Peminat ngarap lagu Clemend Man ulih masuk CSJ

LAGU ke diberi nama Kumang Ku Timang nya mih mujur ngangkatka nama aku ba industri muzik Dayak tu, ku Clemend Man.

Kena 22 Januari tu tadi, Clemend Man mega udah mansutka siti agi lagu rumpas, Tempurung Rekung ulih dipeda ba laman Youtube Channel Twin Tone Production.

Pia mega, lagu nya udah dipeda lebih ari 18,000 lalu nerima 67 timbal ari bala peminat.

Tiun enggau leka lagu Tempurung Rekung nya ditengkebang Clemend empu.

Lebuh macha timbal ari bala peminat ba Youtube Channel nya, bisi madahka sida rindu ninga patah nyawa Clemend ke manah enggau lembut sereta tiun ke manah.

KARUNG ALBUM.. Lagu Clemend Man mega bisi dipasuk dalam Album Kedemba Kedembi.

Bisi kedua ngarapka lagu tu ulih masuk Tusun Charta Sapa Juara (CSJ) enggau bala peminat iya mega madahka leka lagu nya manah sereta Clemend empu ngembuan patah nyawa ke lundai.

Bisi mega bala peminat minta Twin Tone Production mansutka video karaoke.

Ngelansa pasal lagu Kumang Ku Timang, diatu lagu tu udah dipeda lebih ari 249,000 enggau nerima 169 jaku timbal ari bala peminat.

Clemend mega madahka tiun enggau leka lagu Kumang Ku Timang nya ditengkebang Beliau Karan@Adam.

Peranak asal Kampung Bedega, Serian tu madahka iya berasai lantang ati laban nerima timbal ke chukup manah ari bala peminat lebuh mendingka lagu Kumang Ku Timang.

Kelimpah ari lagu Kumang Ku Timang enggau Tempurung Rekung, Clemend mega kala mansutka lagu Ukai Lubuk Dalam Gelinung kena 10 Disember 2019.

Lagu tu udah dipeda lebih 5,600 nya mega dipansut di baruh perabung Twin Tone Production.

Clemend mega kala mansutka lagu Mungkir Janji lalu udah dipeda lebih 21,000, lagu Mendam ba Lubuk Ati ke udah dipeda lebih 6,400 enggau lagu bukai.

RINDU BELAGU… Clemend rinduka pengawa belagu kenyau ari mit.

DUNYA PEMERINDANG

Lebuh dirandau, anak pengkuan ari tiga iku diri menyadi tu madahka iya suba endang suah masuk pekit belagu lebuh bisi pekit belagu tebuka.

“Enti bisi orang ngatur pekit belagu, aku endang suah enggau laban rindu belagu sereta ngujika nasip diri.

“Alah tauka menang nya kira dudi ba aku laban peneleba nya lebih berega ngambi ulih ngansah pengelandik belagu.

“Ari peneleba kitai ngelama tu nentuka kitai nemu seling enggau kuing ngangkatka diri ba dunya pemerindang di menua tu.

“Bepun ari rindu belagu tauka masuk pekit nya tadi, aku meransang diri masuk dalam industri muzik Dayak tu begulai enggau bala penanyi ke bukai.

“Aku rindu amat merindang bala mayuh kelimpah tu sebagi ari chara ngansah pengelandik belagu.

“Pengelelak pulai merindang nya endang bisi tang gaga amat meda bala peminat nyukung maya belagu ba sebengkah pengerami tauka Fun Fair.

“Lebuh ngebung ba dunya pemerindang tu, aku ngarapka bala peminat enggau bala mayuh rinduka lagu disadaka aku ngambi lagu aku nya tadi ulih merindang sida,” ku Clemend nerang.

Nambahka nya ku Clemend, iya udah tiga taun ngebung ba dunya pemerindang lalu mayuh kenang manis enggau pait kala diasaika iya ngelama tu.

Clemend mega madahka iya kala ngerikod lagu dalam taun 2002 begulai enggau raban artis bukai iya nya dalam album kompilasyen ba serikat SAVS suba.

“Tang ba taun 2018 baru aku bisi mansutka album keterubah di baruh perabung Twin Tone Production (TTP) betuaika Allen Nyuntai dikumbai Album Kedembi Kedemba.

“Lagu Kumang Ku Timang tu mih ke udah ngangkatka nama aku baka ke diatu.

“Enggau peluang tu, aku meri besai terima kasih ngagai raban dalam Twin Tone Production laban udah meri peluang sereta andalka aku mai lagu Kumang Ku Timang tu.

“Berekat sukung sereta pemanah ari kita tu mih ngujungka lagu Kumang Ku Timang tu dikerindu bala peminat.

“Aku berasai gaga lebuh nerima timbal ari bala peminat pasal lagu tu sereta suah mega lagu tu ditebah sebelah radio maya dipinta bala peminat.

“Terima kasih nuju peminat ti udah nganjung peminta nebah lagu aku ngelama tu sebelah radio.

“Ba aku, nya mih pekara pemadu berega lebuh nyadi penanyi tu, lebuh orang nebah lagu enggau nganjung peminta nebahka lagu aku tu.

“Industri muzik kitai ulih angkat enti nerima mayuh sukung kelebih agi mayuh artis baru majak dikelala bala mayuh baka kulat tumbuh pengudah ujan.

DIKERINDU… Lagu baru disadaka Clemend iya nya lagu Tempurung Rekung mega dikerindu bala peminat lalu ngarapka lagu nya masuk Tusun Sapa Juara.

“Ari nya tadi, kitai sama ngangkatka diri enggau tuju ke betul ngambi industri muzik Dayak tampak rita.

“Tu endang pekara ke manah dikena ngeranchakka agi industri muzik Dayak.

“Nama utai lebih berega kelimpah ari sukung bala peminat baka nganjung lagu peminta sebelah radio, datai maya nuan beperindang?,” ku Clemend tuchum.

LANSA PENGIDUP

Lebuh bejaku pasal lansa pengidup diri tauka kenang manis enggau pait, Clemend madahka nya endang nyadi asam garam ba dunya pemerindang.

Clemend mega madahka kenang nya tau ngasuh kitai majak angkat sereta ngemansangka diri ba genap pengawa dikereja kitai ngambi kitai makin maju.

“Bisi ga orang rinduka lagu kitai lalu bisi ga orang enda rinduka lagu kitai.

“Aku nerima semua pekara nya laban siku-siku mensia udah tentu bisi utai dikerindu lalu bisi utai enda dikerindu.

“Pia mega, bisi orang semampai nyukung kitai lalu ba aku, semua nya nyadi peransang aku bebendar agi angkat ba dunya pemerindang nya.

“Orang ke balat meransang aku sekumbang masuk dalam industri muzik tu endang kami sebilik.

“Lebuh masuk ba industri muzik tu, kami sebilik mih orang keterubah ti gaga lalu nyukung pejalai aku ngelama tu kelimpah ari raban Twin Tone Production tu.

“Jaku ke kala diajar sida endang dikeingat aku belama laban semua jaku nya meransang aku ngangkatka diri ba dunya pemerindang tu.

“Ukai semina nya aja, sida mega bisi belama maya aku tusah tauka senang lalu sida mih tulang belakang aku,” ku Clemend.

Iya mega berasai gaga pengawa ba dunya pemerindang tu semampai disukung sida sebilik.

SUKUNG ARI PEMINAT

KENANG BEGULAI… Clemend begambar ungkup kenang enggau Celestine Ayie, Pamelia enggau bala penanyi bukai.

Kelimpah ari nya ku Clemend, pejalai iya ba dunya pemerindang tu nyangka bisi timpang enti nadai nerima sukung ari bala peminat.

Clemend mega meri besai terima kasih ngagai bala peminat ke udah nyukung iya ngelama tu ari lagu Kumang Ku Timang nyentuk lagu Tempurung Rekung tu.

“Enti nadai kita, sapa mih aku ke diatu. Terima kasih ke sukung kitai ngagai aku ngelama tu.

“Aku naka ulih nyadaka lagu bukai ungkup kita udah tu kelai terima kasih ngagai kita laban rinduka dua iti lagu aku tu.

“Enggau peluang tu, meri besai terima kasih ngagai Suara Sarawak laban udah ngerandau pasal pejalai aku ba dunya pemerindang di menua tu,” ku Clemend nyimpul randau.

Suara Sarawak