KUCHING: Morni Edmund Rapi, 44 menyadi Koperal David Edmund Rapi soldadu ti lenyau maya operasyen di Pulau Perak minta pemendar ngambi barang menyadi iya di Semenanjung din.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah madah Morni bisi betelefon enggau iya ensanus mantaika pengingin ati ngambi barang menyadi sida pulai.

“Morni bisi betelefon enggau minta bantu perintah ngambi barang menyadi iya pulai ke Sarawak.

“Dia iya (Morni) minta bantu meli tambang bilun enggau palan endur diau din,” ku iya.

Fatimah bejaku munyi nya lebuh ditanya pemberita maya Program Nyadung Dagin Lembu ngagai Anak Patu Balu enggau Indai Tunggal ba Surau Darul Muallimin Taman Desa Guru ditu, kemari.

Ku iya, pekara ti dipinta Morni nya deka dipadah ngagai Raban Soldadu Malaysia (ATM) awakka kaban David ulih ngambi barang iya ba dalam kem.

“Aku madah ngagai Morni kami deka berati dulu laban deka netapka jam penerebai bilun ari Kuching ngagai Langkawi sereta timbal ari ATM laban orang luar enda ulih sengapa masuk kem.

“Ba Semenanjung din kitai minta bantu ari Rumah Sarawak ngatur palan endur sida diau.

“Aku ngarapka piak ATM meratika peminta kaban belayan kekedua soldadu tu,” ku iya.

Apin lama kaban Koperal David Edmund Rapi enggau Koperal Moses Logers bisi betemu enggau Fatimah ba opis iya di Begunan Baitul Makmur madah deka betemu enggau orang ti ngempu tanggungpengawa ngiga dua iku ti lenyau nya tauka operasyen SAR.

Kelimpah ari nya, kekedua kaban belayan dua iku soldadu nya mega minta pemendar enggau ngiga seduai tang nyentuk diatu sida lalu bedau bulih sebarang timbal ari piak ATM sentang nya.