Peminta ngaga balai bomba di Kabong udah dikenatai ngagai menteri

KUALA LUMPUR: Perambu nirika sebuah balai bomba di Pelilih Kabong udah dibantai ngagai Menteri Pengawa Berumah enggau Kaunsil Kandang Menua Malaysia, Zuraida Kamarudin.

Sapit Menteri Pengeluar Kuasa enggau Pengeraja Asal, Ali Biju madahka diri udah berandau enggau Zuraida pasal perambu nya sebedau pengawa mantaika Bajet 2021 di Parlimen, Hari Lima tu tadi.

Ku iya, balai bomba tu tau dikumbai sebagi agi perengkaguna pemun ti beguna amat ungkup pengelikun enggau pengelantang rayat.

“Enti kitai berati ba penusah angus pemadu baru di Kampung Hilir Sungai Pala, Kabong kena 2 November tu tadi, kebendar penusah nya ulih diputar enggau jampat enti bisi balai bomba besemak.

“Tang kitai sama bela nemu balai bomba pemadu semak nya Balai Bomba Saratok kira-kira 50 kilometer (km) tauka sejam pejalai ngujungka rumah angus lengis ba penusah nya.

“Nya alai aku ngasaika Opis Menteri Pengawa Berumah enggau Kaunsil Kandang Menua (KPKT) patut berundingka pekara tu,” ku iya lebuh dirandau Suara Sarawak.

Ali ti mega Kaban Parlimen Saratok madahka, Pelilih Kabong endang patut disikap ngena sebuah balai bomba abis nadai Balai Bomba Kelas C.

“Kenyau ari taun 2015 nyentuk ke taun tu bisi enam penusah angus nyadi di pelilih nya ti ngaul pengerugi reta tengkira manggai beratus ribu ringgit.

“Nya alai, Ali andal amat ngambi mayuh agi pemansang ulih dipejalai ba Saratok lebih agi Pelilih Kabong.

“Aku ngarapka randau begulai enggau Menteri KPKT deka mai berita manah ba peminta kitai nirika sebuah balai bomba di Kabong,” tandu iya.

Suara Sarawak