Peminta numbuhka sekula China tinggi

KUCHING: Pengawa mindahka Sekula Bansa China (SJKC) Kai Nang ari Sibu ke Kuching digaga beduduk ari peminta sereta guna sekula China di Kuching ti majak tinggi.

Sapit Menteri Dagang Dalam Menua enggau Pekara Bebelika Barang Chong Chieng Jen madahka SJKC Kai Nang ba Sibu napi penanggul kelalu mimit nembiak laban agi bisi agi dua buah sekula China ke digaga besemak nya.

“Ditu, mayuh rumah baru benung digaga ngujungka raban China nguan palan tu majak mayuh.

“Nya kebuah, peminta numbuhka sekula China ba palan tu chukup tinggi,” ku iya.

Iya bejaku munyi nya lebuh ditanya pemberita maya Bejadika pengawa Meri Surat Pemendar Mindahka Begunan SJKC Kai Nang ngagai Komiti Pemansang SJKC Kai Nang ditu, pagi tadi.

Ku iya, begunan sekula ti baru nya ila ulih nerima urung 2,000 iku nembiak primari.

“Bengunan tu digaga dua renggat. Enti dua begunan tu udah tembu dia urung 2,000 nembiak primari ulih sekula dia,” ku iya.

Tandu iya, diatu sida komiti agi nganti pemendar ‘Pemendar Ngemansang’ ari Perintah Nengeri numbuhka sekula dia.

“Kitai udah bulih pemendar ari Opis Pelajar mindahka sekula tu ari Sibu ngagai Kuching.

“Nyadi diatu, kitai ngarapka ‘Pemendar Ngemansang’ ari Perintah Nengeri dikemendar enggau lengkas,” ku iya.

Tambah iya, peminta nya udah digaga sereta dianjung kena 7 Oktober tu tadi.

Tanah ba pemesai sepulah hektar nya mega agi nganti Opis Menteri Wang ngemendarka ungkus ‘pendahuluan’ RM2 juta dikena ngaga bengunan sekula.

Sama bisi datai Adun Pending Violet Yong, Chairman Komiti Pemansang SJKC Kai Nang Lee Jin Chiaw enggau bala bukai.