BELAGA: Peminta rayat ti dekaka Pelilih Mit Sungai Asap nyadi pelilih menua penuh deka dipansik nengah Opis Sekretari Perintah Sarawak.
Kepala Menteri Datuk Patinggi Tan Sri Abang Johari Tun Openg madahka, pekara tu deka dipeda nyengkaum sanding penemu opis nya bekaul garis entara enggau palan ti engkeman dikemanah nyadi pelilih menua penuh.
“Aku enda ulih ngelansa mayuh tang pekara tu deka dipansik dulu.
“Nyema udah nyadi pelilih menua penuh, udah tentu infrastruktur ti bekaul enggau pekara tu mesti dikemanah,” ku iya.
Abang Johari bejaku munyi nya rambau Program Tuai Begulai enggau Rayat di Sungai Asap, Belaga ditu, kemari.
Ku iya, perintah mega deka ngemanahka perengkaguna ngambi ai ngena teknologi di Sungai Asap.
“Bekal ai udah digaga, semina bisi penanggul ngambi ai enti lebuh bisi penyadi kes bah tauka ampuh.
“Meda pekara nya kitai kena meh akal, nguji ‘floating water intake’ ngena teknologi baru.
“Entara bukai peminta pemansang ti diperambu iya nya kompleks nembiak enggau stadium laban Liwan (penyandang Dun Belaga Datuk Liwan Lagang) madah agih belanja stadium bedau chukup.
“Ungkup jalai betanam betupi, Perintah Sarawak udah nunaika 60 kilometer jalai betanam betupi ke alai laluh 103 kilometer deka dipasukka ba Ejensi Pemansang Ulu Rajang (URDA),” ku iya.
Ku iya, rayat ulih meda rikod pemansang ti dibai iya ngagai nengeri Sarawak dalam timpuh tiga taun ti udah lalu.
“Kitai mesti ngatur pemansang enggau manah, tu meh gaya aku megai perintah.
“Lebuh kitai deka muka tanah ungkup betanam betupi, kitai ngaga jalai alun dulu ngambika tanah ungkup betanam betupi nya ulih dikeraja rayat,” ku iya.
Dulu ari nya, penyandang Dun Murum Kennedy Chukpai Ugon bisi ngenataika sepuluh peminta pemansang ari rayat di Sungai Asap.
Entara peminta tu iya nya, ngaga jalai akses betanam betupi ungkup 2,917 lot betanam betupi, minta Skim Nangkir Genturung Pendiau (SPK) di BRS Sungai Asap enggau Skim Pengentap Pendiau Baru (SPS) di Apau Koyan enggau Kampung USK Sungai Asap, nambahka agih tanah tambah lot betanam betupi di BRS Sungai Asap, minta Pelilih Mit Sungai Asap nyadi pelilih menua penuh, minta mayuh agi tuai raban bansa dichiri ba Pelilih Menua Belaga, minta kelaung bayar bil ai peranak di SPS Bakun Sungai Asap 2017 ngagai 2021, minta agih belanja ngaga palan enggau gerija besai Roman Katolik (RC) di BRS Sungai Asap, ngaga palan nembiak, agih tambah stadium lumba Pelilih Menua Belaga enggau ngemanahka jalai balak ke Ulu Jelalong, Tubau.
Ku iya, semua tu dipinta rayat lalu rayat mega ngarapka projek pemansang ti diatur perintah digaga enggau lengkas.
Ba program nya kemari, Abang Johari mega nyuaka surat tanah ngagai peranak di Sungai Asap, Bantu Perengka Berikan (BIPPN) nyengkaum Batu Baja Sawit enggau Lada (BBKSL) penyampau RM1,682,682 ti meri pemaik ngagai 228 iku raban orang berikan enggau 1,259 iku raban orang bekebun.
