Pemisi Sarawak dibagi enggau rayat

KUCHING: Nadai utai ulih nagang Sarawak ari terus nyingkang nyapai pemansang ke pemaik rayat di nengeri tu.

Presiden Parti Rakyat Bersatu Sarawak (SUPP) Datuk Seri Dr Sim Kui Hian madah, genap pemujur ke dikemisi Sarawak deka dibagi enggau rayat nadai ngira bansa enggau pengarap.

“Taja pia, nya enda ulih digaga enti rayat Sarawak pambar ketegal orang diri empu enggau orang luar,” ku iya nengah penerang ke dibantai ba laman media rama rasmi Dr Sim Kui Hian, tadi.

Tandu iya, maya napi penyadi Covid-19 ke benung raya jam diatu kitai patut ngemeratka isu pandemik tu.

“Tu nyengkaum bejalaika Atur Mindah Betagang (PKP) 2021, dikena ngurangka pengerekai Covid-19.

“Program vaksinasyen ditambah ngambika peranak nengeri tu bela serap nerima vaksin kena bulan Ogos tu ila.

“Kelimpah ari nya, ekonomi mega patut diidup (berengkah enggau pengawa meri bantu pemakai, bantu ngagai B40, enggau M40 begulai enggau Perintah Besai sereta ekonomi pasca Covid-19),” ku iya.

Berebak enggau nya, iya nerang pasal ngintu taun ke-62 SUPP iya meri terima kasih ngagai rayat Sarawak, pemungkal parti, tuai dulu suba enggaud iatu, kaban SUPP, penyukung sereta kaban SUPP di serata Sarawak enggau menua luar.

Ku iya, pengelama 62 taun sida ke gawa ke Sarawak enggau rayat nengeri tu.

“Pengudah taun 2018, kami bebendar nyapai juluk Sarawak dibaruh Perintah Gempung Parti Sarawak (GPS) enggau Kepala Menteri (Datuk Patinggi Abang Johari Tun Openg).

“Taja pia, kami nyau begadai ngereja pengawa ketegal Covid-19 tang nya enda lama aja, kami deka nampung pengawa ngemansangka Sarawak maya taun 2025 nyentuk 2030,” tegasnya.

Suara Sarawak