ARTIKEL

Pemuas bekuli Freddy nguji bekebun chabi fertigasyen

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Pengelaku chabi ba makit menua meransang Freddy Peter ransing ngepunka pengawa nanam chabi chara fertigasyen.

Lebuh dirandau, Freddy Peter anak Tonik ke tampak agi dikangau Freddy madah, iya ngepunka pengawa nanam chabi ketegal nerima mayuh peminta ba makit menua.

Ku iya, chabi diatu berega tang menua Malaysia agi meli chabi ari Thailand.

Peranak asal Kampung Tanjong Poting, Singai tu madah, sebedau tu iya gawa ba Bintulu urung 10 taun.

“Pemuas ke bekuli ba Bintulu, dia aku berunding deka pulai ke menua diri laban udah lama diau ba menua bukai.

PENGAWA KE MANAH… Datuk Henry begambar enggau Freddy rambau ngabas kebun chabi iya.

“Tambah mega, aku endang bisi perambu keran deka bekebun ba tanah diri empu di menua.

“Bulan March tu tadi, aku pindah gawa ngagai Kuching lalu berengkah bekebun,” ku Freddy ke mega bansa Bidayuh, Bau.

Freddy, 32 taun madahka diri urung lima bulan udah berengkah betanam chabi chara fertigasyen tu.

Naka diatu, iya madah udah nanam 500 paung chabi chara fertigasyen tang apin mansutka asil laban chabi nya bedau mansau magang.

Nampung baru randau, Freddy madahka diri nanam chabi tu semina ba tisi rumah enggau disaup bini iya maya iya gawa siang hari.

DISUKUNG

BETANAM BETUPI… Gaya kebun chabi Freddy ditanam ngena chara moden.

Freddy madahka diri berasai lantang ati laban pengawa iya betanam betupi tu disukung sida sebilik kelebih agi bini iya.

“Bisi ga bala anak menyadi enggau ke bukai nyaup aku ba pengawa nanam chabi baka ngisi tanah ngagai kambut plastik tauka dikumbai polibeg nya, nyaup nusun kambut plastik dalam kebun.

“Baka maya chabi ditanam aku tu nyau bisi bebuah, suah amat sida nyaup aku ngetau asil nya.

“Taja sida meruan nulung aku ngetau asil, tang aku sigi meri sida gaji nitihka jam.

“Bejaku pasal pengawa ngetau asil tu, ba bulan March enggau April tu tadi, aku bisi ngetau mimit asil chabi ke udah mansau.

“Tang chabi aku tu enda seretai mansau laban aku chabi tu ditanam aku dipupuk mimit-mimit.

“Reti ku aku nya, 500 paung chabi nya ditanam aku berenggat sereta enda ulih seretai laban nadai mayuh bala enggau aku nanam chabi nya,” ku iya nerang.

Iya madahka diri bekebun chabi ba tanah belakang rumah pemesai dalam 25meter x 40 meter.

Nambahka nya, Freddy keran deka ngemansangka pengawa nanam chabi tu sereta nyadi pekebun moden laban iya nemu pengawa betanam betupi chara moden tu ngenataika mayuh untung.

Ku iya nerang, pengawa bekebun chara moden diatu endang jauh muntang ari chara lama laban enda bepegaika changkul baka ke suah dikereja kitai dulu suba sebedau bisi chara baru ke diatu.

Freddy madahka diri deka nangkir endur iya bekebun ngambi mayuh agi paung chabi ditanam.

BEDANDANG BESAI… Projek chabi fertigasyen dikemansang siku pekebun biak asal ari Kampung Tanjong Poting, Singai tu.

“Ngelama tu, aku suah nyual chabi chara ngangkat ba tamu di Emart enggau Pasar Bau.

“Enti baka nadai mayuh asil ketau, dijual aku semak ditu aja laban nadai lama aja orang napatka chabi aku tu.

“Kebendar, taja enda pedis ngintu chabi tu tang daun nya suah geletang tang aku ulih ngubat ngena rachun chabi ke udah disedia.

“Pia mega, pemar ditapi aku nya puku enda chukup, nya kebuah paung chabi aku enda mansau seretai laban ditanam berenggat nyentuk 500 pun,” ku Freddy madah baru.

Sebedau tu, Freddy madah iya enggau bini iya kala masuk kus fertigasyen.

Seduai masuk kus dikena nambahka penemu pasal betanam chara fertigasyen ba Think Big Tranning Kota Samarahan dipelanja Kaunsil Pemansang Ekonomi Sarawak (SEDC).

Nya alai, Freddy madahka diri chukup gaga laban diberi peluang belajarka bemacham penemu baru sentang pengawa betanam chara fertigasyen pengelama tiga hari berengkah ari 24 ngagai 26 March tu tadi.

“Bemacham penemu dikunsi bala pengajar lebuh kus nya tadi lalu umbas amat dibai pulai ngambi nguji betanam chara fertigasyen tu.

“Bai ati sigi keran sereta lama udah dekaka betanam, pemulai ari kus nya, kami duai bilik aku sigi nguji nanam chabi chara fertigasyen.

“Chara tu endang chukup manah laban ari nya tadi, kitai ukai semina ulih ngelimat tanah tang mega ulih ngelimat belanja lebuh deka ngepunka pengawa betanam bedandang besai.

“Mulaika kenang, lebuh agi gawa ba Bintulu, suah bendar aku berunding deka pulai ke menua laban ngenang aku bisi tanah endur bekebun.

“Tang, aku agi berunding nama utai ke tau ditanam ba tanah nya sereta tau mansutka mayuh asil.

DIINTU MANAH… Gaya chabi ke benung galak laban chukup intu enggau semampai diberi Freddy sum.

“Suah aku meda Facebook enggau Youtube sentang utai tanam ke muntang ditanam.

“Udah nemu chara fertigasyen, dia aku sedia deka betanam ngena chara ke moden tu.

“Enda lebu betanam chara fertigasyen kelebih agi pekebun moden ke suntuk tanah endur betanam,” ku iya.

CHARA NGINTU CHABI

Nerang pasal chara ngintu chabi ngambi galak enggau bebuah manah, Freddy madahka pengawa nanam chabi tu bisi mayuh chara laban paung chabi mudah ditepan penyakit daun geletang enggau mati.

Nya alai, iya madahka bisi tiga chara ngintu paung chabi ke alai kesatu, manchit rachun dua kali seminggu dikena nyeliahka daun enda geletang.

Kedua, chara meri sum mesti nitihka pematut baka enti paung chabi nya besai sereta benung bebuah.

Ketiga nya, ngintu paung chabi ari mit dataika besai baka cara muai dan sereta nanchang paung chabi nya ngena tali ngambi enda tumbang.

“Taja pen kitai mesti nitihka tiga chara nya tang kebendar mayuh pengelebih nanam chabi baka chabi tu tan lama pengudah diketau enggau berega.

“Baka ke dipadah aku tadi, kitai mesti ngintu enggau ngabas chabi tu ninting hari dikena nyeliahka chabi nya bisi kachau indu utai tauka penanggul bukai.

“Ke pemadu beguna nya mesti meri sum ke chukup enggau manchit daun ngena rachun ke patut ngambi enda dikachau indu utai.

PATUT DITUNDA… Datuk Henry disempulang bala bukai ngabas kebun chabi ke ditanam Freddy chara fertigasyen nya.

“Nanam chabi chara fertigasyen tu chukup muntang laban kereban diguna nyamai dibeli baka sum enggau ke bukai lalu kitai mega mudah nyual sereta ngelakuka chabi sebelah media rama baka Facebook.

“Kebuah pia laban ba Facebook tu, kitai ulih mantaika chabi enggau produk ba Marketplace ngambi bala penguna ulih terus nanya ngagai kitai,” ku iya madah pengelebih teknologi digital.

Sebedau tu, iya apin kala nerima bantu baka puku kena bekebun laban naka diatu, iya ngena puku kediri empu baka nanam 500 paung chabi tu.

Udah tu, Freddy merambu deka minta bantu ngagai Opis Menteri Betanam Betupi dikena ngemansangka agi pengawa nanam chabi tu.

PATUT DITUNDA

Nampung baru randau ke dalam agi, Freddy madahka diri berasai chukup gaga enggau temegah ati laban pengawa iya bekebun matak perati siku pengari rayat dia.

“Chukup betuah laban pengawa aku nanam chabi chara moden tu udah matak perati Adun Tasik Biru, Datuk Henry Harry Jinep.

“Enda nyangka amat iya sanggup limpang ngabas kebun chabi aku kena 22 Julai tu tadi.

“Ba penemu aku, penemuai pengari rayat kitu mandangka perintah nyukung pengawa dikereja kitai.

“Iya chukup gaga meda pemujur aku ke berani ngaul diri ba pengawa betanam betupi chara moden tu laban bisi anembiak ngemansangka pengawa bekebun chara fertigasyen.

“Lebuh datai ba kebun aku ditu, dia Datuk Henry meri pengaga ati ke pemujur aku tu sereta ngarapka pengawa aku tu tau nyadi peransang ngagai rebak biak berani ngaul diri ba pengawa betanam betupi chara moden.

“Munyi ku jaku ke suah dikenatai Kepala Menteri Datuk Patinggi Abang Johari Tun Openg ngagai kitai, bisi tanah puang kena aja lalu anang nejuka tanah kitai pia aja.

“Datuk Patinggi Abang Johari mega suah madah, teknologi betanam betupi pintar ulih nyungkak sektor betanam betupi ba menua tu.

“Kala mega iya madah bala pekebun moden mesti ngena kereban teknologi pemadu baru ngambi mansutka mayuh asil.

“Sigi betul penemu dibantaika tuai kitai, sayau bendar tanah ke tau mansutka mayuh asil nya diteju pia aja.

“Ari nya tadi, aku bisi ati deka ngemerambika agi projek chabi fertigasyen tu dudi hari enggau pemisi tanah aku tu,” ku Freddy gagaka pengawa dikereja iya diatu.

PENGAWA DISUKUNG… Bini Freddy benung matau kebun chabi ditanam ba tisi rumah sida.

CHARA MODEN

Pengawa dikereja Freddy tu patut ditunda kitai kelebih agi rebak baru.

Lebuh ngenataika jaku peransang, Freddy madahka bedau laun kitai belajarka utai baru ba pengidup dikena ngemansangka menua diri empu.

Ku iya, penemu pasal teknologi pemadu baru tu beguna amat, ukai semina bulih penemu baru tang ulih nambahka penatai pemisi.

“Pesan aku, sapa bisi tanah kena meh endur bekebun ngiga belanja lebih laban mayuh bendar penguntung diatu.

“Baka pengawa dikereja aku, chukup mayuh pengelebih betanam chara fertigasyen laban nyamai enggau jampat agi.

“Tambah mega, kitai enda lelak ngintu utai tanam lebuh bekenaka chara moden laban kitai semina ngemata aja ngambi enda dikachau indu utai.

“Enti sema enda nemu pasal pengawa betanam tu, kita tau belajar laban ba jeman moden diatu, bemacham chara kitai ngiga penemu ke baru.

“Baka tudah aku pen bepun ari baruh baka suah masuk kus ke diatur sida SEEDC nyengkaum kus ngepunka pengawa betanam chara fertigasyen enggau kus fertigasyen chabi.

MAYUH PENGUNTUNG

MANSUTKA ASIL… Entara chabi ke udah mansau enggau benung manah dijual.

Berebak enggau nya, iya madahka diatu bemacham peluang bedagang bepelasarka betanam betupi lalu mayuh pekebun udah mujur.

Nya alai, Freddy madahka diri ngembuan juluk ati nyadi pekebun moden ke mujur ngambi nyadi chunto ngagai rebak dudi.

“Jeman diatu ukai baka suba, diatu kitai ulih bekebun chara moden lalu pengawa mega muntang agi.

“Nya kebuah, nadai kebuah rebak biak enda ulih ngereja pengawa bekebun lalu anang nganti nyau udah badu gawa baru deka ngereja pengawa betanam betupi tu.

“Aku mega ngarapka perintah seruran nyukung produk menua baka sayur enggau bukai kelai sukung ngagai bala pekebun.

“Reti iya tadi, sida patut ngurangka meli produk ari menua bukai baka meli chabi ari menua Thailand,” ku iya nyemetak madah.

Kelimpah ari, bemacham inisiatif dipejalai Perintah Sarawak dikena nyapai tuju nyadi nengeri maju manggai taun 2030.

Tu nyengkaum pengawa bekenaka teknologi digital ba genap pengawa dikereja baka pengawa betanam betupi.

Teknologi digital tu ukai semina nyadi pemun nambahka produktiviti enggau kualiti aja tang mega ulih ngelimat belanja baka betanam chara fertigasyen ti dikemansang Freddy Peter tu.

Teknologi Lot of Thing (LoT) enggau Data tu ulih mantu orang bumai enggau pekebun ngambi badu agi ngereja pengawa betanam chara lama.

Nambahka nya, ngemeranka chara betanam betupi pintar bekenaka teknologi pemadu baru tu dikena nyaup pekebun muntang agi betanam.

Polisi Ekonomi Digital dibantai Abang Johari nya sebagi ari chara nentuka Sarawak ulih maju ari sukut pengawa eksport produk betanam betupi enggau ke bukai.

Pekara tu mandangka sektor betanam betupi bisi pengulih dikemansang lalu nangkup peminta makit eksport sereta nyungkak pemansang ekonomi Sarawak.

BERITA LAIN

Nempa Sarawak nyadi tibang pemakai

TUSUN KETERUBAH MINAT Reynold anak Jacktola, 29, ti rindu agi dikangau Nol ba pengawa betanam betupi nya endang dikembuan iya ari mit laban iya datai

Tebing Sungai Saratok deka diseleti meruan

SARATOK: Perintah Sarawak deka nyeleti pengkalan ba seberai Pasar Saratok enggau jematan dikena ngelayang Sungai Paon. Kaban Kunsil Nengeri (ADUN) Kalaka, Mohamad Duri madah, sepenyampau

BERITA TERBARU