Pemujur Nicodemus mai nama Sarawak tampak rita

KUCHING: Pemujur Nicodemus Manggoi Moses bulih midul emas udah mujur mai nama Sarawak tampak rita ba mata dunya.

Menteri Muda Nembiak enggau Lumba Datuk Snowdan Lawan madahka pemujur Nicodemus nya ulih nyadi peransang ngagai atlit menua tu ngulihka pemujur ba tikas entarabansa lebuh ngarika menua ba pekit bukai ti deka datai.

“Ngarika Perintah Sarawak, aku ngenataika pengaga ati ngagai Nicodemus laban iya udah mujur bulih midul emas ba pekit Piala Dunya Powerlifting Bangkok, Thailand, ensana.

“Semua orang Sarawak chukup temegah enggau pemujur iya (Nicodemus) lalu aku mega meri pengaga ati ngagai raban jurulatih ti udah besaup ngemujurka pekit tu,” ku iya lebuh ditanya Suara Sarawak, kemari.

Tandu Snowdan, ngulihka midul emas ba tikas entarabansa tauka dunya ukai pekara ti muntang.

“Raban atlit enggau jurulatih ti belatih nya ukai sehari dua, tang berekat pengeliat ati enda ngira lelak sida dibayar enggau pemujur besai.

“Endang pengarap kami ari opis menteri, lebuh nganjung sida bepekit kin, kami sigi ngarapka raban atlit bulih pemujur,”ku iya.

Iya mega muji Nicodemus laban ulih ngangkatka pemerat 190 kilogram ungkup kategori 88 kilogram dalam pekit nya lalu ngujungka iya teulihka midul emas.

“Perintah Sarawak seruran nyukung sereta ngarapka pemujur enggau pengelikun raban atlit menua kitai,” ku iya.

Nicodemus ngalahka atlit angkat berat ari Thailand, Ton Yarnpairat ba penuduk lumur dua enggau atlit ari Iraq, Salam Al Shakakee ba penuduk lumur tiga.

Pemujur nya ngasuh Nicodemus nyadi atlit ba ranking ke-12 dalam napatka tikit ngagai Lumba Paralimpik Tokyo ti deka datai.

Suara Sarawak