KUCHING: Sukung enggau kerejasama tuai raban bansa (KK) sereta gerempung ukai perintah (NGO) dalam meri penerang pasal projek pemansang nyadi kunchi pemujur Pemansang Ngemaruka Mengeri tauka ‘Urban Renewal Development’ di Darul Hana.

Sapit Menteri Utiliti Enggau Telekomunikasyen ll Datuk Dr. Abdul Rahman Junaidi madahka iya berasai gaga laban projek nya diterima belubah-lubah rayat ari sukung tuai raban bansa enggau gerempung bekaul.

“Mayuh randau enggau program diatur entara rayat enggau ejensi ti bejalaika projek kenyau ari taun 2011 suba.

“Lebih ari 100 bengkah randau dipejalaika baka aum, saut tanya enggau licha ari raban pemaju LCDA, HDC, Opis Residen Bagi Menua Kuching, Dewan Bandaraya Kuching Utara, Opis Muzium Sarawak enggau ke bukai diatur awakka rayat enggau komuniti kandang menua meretika enggau nemu tuju kitai mindahka sida,” ku iya.

Abdul Rahman bejaku munyi nya rambau Program Nyuaka Surat Hak Tanah, Chek Pampas Tanah enggau Kunchi Rumah Darul Hana sereta Bejadika Surau Blok 1A ditu, kemari.

Ku iya, mayuh isu enggau penanggul dipansutka dalam meri pemaik ngagai semua piak enggau awakka nyapai tuju pemansang nya.

“Puji Tuhan, sehari tu (kemari) bisi 337 KIR ari Kampung Semarang, Kampung Panglima Seman Lama enggau Lot Tambahan udah mujur pindah ngagai rumah sida.

“Pemansang Darul Hana ngaul 12 buah kampung ari Kampung Boyan ke Kampung Bintawa mungkur 2,607 KIR, 1,819 ruang bilik tambah enggau 16,986 peranak menua.

“Aku meri terima kasih ngagai semua raban bekaul ti udah ngemujurka projek tu lalu andalka rayat di kandang menua nya ulih nguna perengkaguna ti disediaka perintah enggau manah,” ku iya.-INDUN SILONG