BINTANGOR: Pengeransing siku pekebun di Sungai Padi Meradong patut dichunto pengudah mujur ngemansangka bemacham utai tanam dikena nupi diri sebilik.
Ting Sing Chiu ngemansangka tanah urung 150 ikar pemesai ukai semina nanam buah mangga, kristal enggau dabai tang mega bisi nanam buah ke berega iya nya avocado enggau rian musang king.
Pemujur nya nerima perati Kaban Kunsil Nengeri (ADUN) N.46 Meradong, Datuk Ding Koung Hiing ti udah datai ngabas kebun nya kemari.
“Utai tanam nya tumbuh galak lalu sebagi ari nya udah mansutka asil. Pekebun nya mujur mandangka nadai utai enda ulih digaga, seagi bisi pengeransing ati.
“Tu mega mandangka Meradong bisi tanah ke ami enggau bisi potensi besai nyadi pengeluar asil utai tanam ba Sarawak,” ku iya.
Nya alai, iya ngarapka Perintah Sarawak engga Opis Betanam Betupi ulih meri sukung baka bantu belanja enggau meri perengka guna nyengkaum ngemanahka jalai alun awakka asil nya nyamai dijual.
“Aku mega ngarapka pekebun ba pelilih Meradong bekunsi penemu enggau Ting, betanya baka ni chara iya ulih ngasilka buah berega nya enggau tau meri untung,” ku iya.
Berebak enggau nya, Ding madah perintah deka terus ngemansangka sektor betanam betupi laban nemu potensi besai bidang nya dikena nyungkak sosioekonomi rayat lebih agi ba pelilih tu.
Sama bisi datai Pemantu Pegawai Pelilih Meradong, Thomas Geoffrey Kendawang, Pegawai Betanam Betupi Pelilih Meradong, Tahir Dullah, Pemancha Yii Hee Sieng.
