Pemungkal nuju pengerai enggau pengelepas

Sebedau nyingkang ngagai taun baru tentu semua bala kitai bela udah ngeletak juluk ati diri, nama utai ke deka dijapai ba taun baru 2021.
Taja pia, kati baka juluk kita ba taun tu tadi wai seberai? Bisi udah dijapai kini tauka enda sempat dijapai tang enda ngawa ni bagi juluk ke bedau ulih japai taun baru tu mih kitai bebendar agi ngulihka juluk ati nya.
Penghulu Ruai ba taun baru ila iya nya deka meda pemujur kitai ngelepas diri ari tanchang Atur Mindah Betagang (PKP) ke dipejalai kenyau 18 March taun tu tadi ketegal pangka pengerekai penyakit Covid-19.
Diatu bekau litan pangka penyakit tu meruan ngachau pengidup ngujungka kitai berasai nangi tiap kali betemu enggau semua orang.
Genap kali pansut ari mua rumah, asal nyingkang ngilah kaki lima rumah utai ke lumur satu enda tau enda dibai iya nya sengkabung mua. Semua kitai dipinta nguna sengkabung mua tu nadai ngira renggat umur nyengkaum tuai biak, orang kaya enggau orang mensena mesti nitih Atur Pengawa Standard (SOP) ke udah diletak perintah.
Tuju atur SOP tu ke pemaik kitai empu enggau orang bukai. Nya alai, bela terus ngasika SOP tu awakka penyakit tu ulih diseliah sereta nentuka menua kitai tau pulai likun baka sebedau tu.
Diatu diperita mega, menua kitai udah bulih tipang (vaksin) dikena rayat di menua tu nyeliah diri ari kena rampit penyakit Covid-19.
Taja pia penatai sakang nya ba renggat keterubah ila deka diberi dulu ngagai raban terabai menua enggau bala pesakit raya.
Pekara tu udah dikenuku ke Direktor Opis Pengerai Menua Malaysia (KKM) Dato Sri Nor Hisham Abdullah ba sebengkah aum pemberita ke diatur di Kuala Lumpur, apin lama ke udah.
Ungkup rikod, naka 29 Disember tu tadi penyampau kes positif Covid-19 ba selampur Malaysia bisi 108, 618 kes nyengkaum ba Sarawak iya nya 1,110 kes. Ari penyampau semua tu kes positif nya, penyampau orang bebadi nyawa ketegal penyakit tu bisi 457 kes.
Ngelansa pekara bukai tauka ulih dikumbai pekara besai deka nyadi di Sarawak, ba taun baru tu ila kitai di nengeri tu deka napi Pengawa Bepilih Besai Nengeri Ke-12 (PRN12).
Nyadi kati baka kitai rayat udah sedia kini napi pengawa PRN deka datai enggau penyadi penyakit ke agi mengkang ngerekai?
Taja pia, PRN tu munyika udah disebut Kepala Menteri, Datuk Patinggi Abang Johari Tun Openg iya enda tau enda diatur laban timpuh Kunsil Nengeri (Dun) udah abis timpuh lalu perintah ke ngiring nengeri mega mesti di tumbuh dikena neruska atur pemansang ke udah dilanggur.
Nya alai, kitai bela besampi awakka PRN12 ila lanchar diatur nitihka SOP ke deka ditetap. Pia mega, PRN12 ulih ke enda rayat Sarawak ngaga sejarah baru ngembuan perintah ke diperintah parti politik baru tauka agi terus dipegai Gabungan Parti Sarawak (GPS)?
Di Sarawak sekeda parti politik ti deka bepadan ngetanka menalan diri tauka deka nguji menang bulih penuduk parti ba PRN12 tu ila iya nya GPS ke diarika PBB, PRS, SUPP enggau PDP ditangkan PSB, DAP, PKR, PBDS, PBK enggau ke bukai.

Suara Sarawak