Pemutus ACSJ Ke-6 nadai mayuh kelikuh

ACSJ ke-6 pemadu nadai mayuh petalat tauka kelikuh penemu laban semua pemutus bepanggai ba juri ti nyengala profesional.

Anugerah Charta Sapa Juara (ACSJ) Ke-6 Miri ke diatur kena 2 November 2019 ba Eastwood Golf & Country Club mai siti tikas enggau imej baru ngagai lagu pop Iban di Sarawak.

Penatai akim luar iya nya Direktor Muzik Orkestra RTM Datuk Mokhzani Ismail enggau Datuk Freddie Fernandez ari Kuala Lumpur mega mai pengasai mod enggau perspektif baru ngagai artis lagu Iban empu.

Ba ACSJ Ke-6, RTM enggau produser beniat deka ngangkatka standard anugerah lagu Iban sama tikas enggau “anugerah juara lagu” ke bukai ke bisi diatur di Semenanjung Malaysia.

Taja pan niat enggau pekara tu enda ulih terus nyadi nyata diatu tang nyangka icha dudi hari iya ulih nyadi nyadi nyata baka ti diniat nya.

LUMUR DUA…Eyqa bulih dua perais iya nya lumur dua enggau menang kategori Sada Nyawa Pemadu Manah.

Raban finalis ACSJ ke-6 nya NK Yongai mai lagu ke diberi nama ‘Indai’, Isa Lee (Tubai Pengerindu), Alexander Peter (Tanggam Rat Ba Ati), Dominic Christy (Siti Sumpah Siti Janji), Tony Rumpang (Jauh), Frederick Sut (Anyut), Joseph Dresa (Ganti Ti Menyana), Eyqa Saiful (Empeleman), D’Crystal
(Kemayang Nuan), Taju Remaong (Jempuk) enggau The Crew (Ayas Nuan).

Champion ACSJ ke-6 nya Taju Remaong, lumur dua Eyqa Saiful lalu ketiga The Crew. Taju Remaong mega menang ba kategori lagu pilih peminat nengah undi sms enggau leka lagu pemadu manah.

Eyqa Saiful kelimpah bulih lumur dua mega menang ba kategori Sada Nyawa Pemadu Manah. Semua finalis nerima perais mata duit, trofi enggau produk kosmetik enggau pengias (minyak angi) ari Adriella Perfume.

Penyampau perais lumur satu iya nya RM10,000, lumur dua RM8,000 lalu lumur tiga RM5000. Sada Nyawa Pemadu Manah nerima perais RM2,000. Pemenang kategori lagu pilih peminat (undi sms) enggau leka lagu pemadu manah semina nerima trofi ari Adriella Perfume.

Ari ACSJ ke-1 nyentuk ngagai ACSJ Ke-5, pekara ti selalu nyadi petalat tauka mai orang enda lantang ati nya bala akim.

Mayuh mih kebuah enggau pekara ti ngasuh sida enda lantang ati. Orang ti balat kena pangka jaku bantah tu nya produser.
Kebuah pia laban ba pememu sida, akim dipaduka produser kediri aja.

“Terima kasih ngagai semua peminat ACSJ ketegal pemanah sambut kita ari ngelama tu ti udah. Sekeda kitai nyangka bedau nemu chara milih akim.”

AKIM PROFESIONAL

ILA NGUJI BARU…Raban The Crew bulih penuduk lumur tiga ba pekit nya.

Nama chalun juri dulu dibai agai aum komiti besai ACSJ. Sida nya meseti bisi pengelandik ba bidang muzik enggau seni lagu.

Pemutus milih juri ukai pemutus aku siku tang pemutus majoriti nyengkaum Direktor RTM ke nyadi penyanding
penemu komiti.

Ba ACSJ ke-6 tu, kitai bepeluang teulihka Mokhzani nyadi ketuai juri enggau Freddie ari Kuala Lumpur.

Arapka peminat, artis enggau semua orang ba industri ulih meda sereta mereti chara kami milih juri,”,ku Monica
Midi ke udah enam taun nyadi produser ACSJ.

Ketuai akim ACSJ Ke-6, Mokhzani madah iya chukup temegah ati laban ACSJ di Miri nerima sambut ti chukup badas ari mensia mayuh.

Nitihka penemu iya, lagu Iban ulih dibai ngagai tikas ti tinggi agi ari kediatu. Taja pan pia ku iya, chara pemerindang ari sekeda finalis agi tau dikemanahka agi.

Ari ACSJ keterubah nyentuk ngagai ACSJ ke-6, mayuh ubah enggau pekara baru digaga kena ngemanahka agi anugerah nya.

“Mayuh ubah udah digaga kami dikena ngemanahka agi ACSJ. Belabuh ari perais enggau kategori pekit, ACSJ bisi ubah ninting taun. Diatu perais pemenang udah manggai agai RM10, 000.

Pia mega diatu nyau majak mayuh bala sponsor enggau gerah ati nyukung ACSJ.

Semua ubah tu bepun ari pengarap sida ke ACSJ ke nyengala ulih nyungkak nama enggau kualiti lagu Iban,” ku Monica ke mayuh peneleba pait manis tiap kali ngatur program tu.

BISI INSUR MANAH ARI KE UDAH

ACSJ ke-6 tau dikumbai iya ti pemadu badas ari segi panggau, lampu enggau sistem bunyi. Nambahka nya, ACSJ ke-6 pemadu nadai mayuh petalat tauka kelikuh penemu laban semua pemutus bepanggai ba juri ti nyengala profesional.

Monica lebuh dipinta nyaut sekeda tanya peminat ACSJ ba facebook sentang juri bansa bukai ke nyadi ketuai juri, iya madahka lagu enggau muzik nya pekara “universal” lalu iya ulih dikelala sereta
diperetika semua orang.

“Ba kategori leka lagu ti pemadu badas, kami bisi minta bantu juri ari Tun Jugah Foundation ti betuaika Dr
Robert Menua Salleh.

Ba juri lagu enggau muzik kitai mega bisi akil juri kitai Iban empu iya nya Ricky Jay ari ANP Miri ti tebilang ngaga lagu enggau muzik Iban.

Aku arap bala finalis enggau peminat semua bela puas ati magang. Enda menang sekali tu nyangka tau ga
menang maya ke bukai.

Ba aku, semua finalis bela udah nyadi juara lebuh lagu sida nyadi juara ba charta suba,”ku Monica.

Nyadi siku ari finalis ACSJ ke-6 enggau peminat lagu Iban sambil nyadi akil pemberita ari Suara Sarawak, penulis bulih mayuh penemu pengelama
enam hari di Miri.

Taja pan pia, komen tu ukai dituju tauka dipanggaika ba siku aja tang nyangka icha dudi hari ila iya tau nyadi ke lalau enggau tenggau semua kitai. Anang enggai lebuh nerima jaku pejah orang laban nyangka komen sida nya bisi pengamat.

Diri empu enda ulih nyadi akim ba pengawa diri; sebaka mega enggau finalis ba pekit belagu. Arapka ACSJ ti deka datai terus ngambi juri ti nyengala
profesional; bisi rikod tinggi ba akademik, lagu, muzik enggau semua pengawa seni.

Isu bansa Iban enggau ukai bansa Iban nyadi juri ACSJ ukai isu besai. Taja pia, diatu udah bisi kitai Iban tau nyadi juri ACSJ tang nyangka sida nya bedau diberi peluang tauka bedau dikelala.

Ari segi protokol endur peduduk ungkup penyukung finalis mega siti pekara ti tau diatur badas enggau
terit agi dudi hari ila.

Taja pia, mensia mayuh nyangka meretika pengawa nya sigi enda ulih dikereja bala DJ Waifm kediri betapi enggau beribu iku mensia ti datai enda disadang.

Trofi finalis enggau pemenang mega bisi kena lansa randau facebook peminat lagu Iban. Saiz trofi ti mit mega bisi kena sebut. Anang saru sentang isu tu laban peminat ngasaika “imej” finalis ti dikerinduka sida patut diberi trofi ti besai agi ari nya.

Ba penulis empu ke nerima trofi nya ngasaika utai nya udah chukup laban finalis mega bisi diberi mata duit enggau duit ungkus perengka pengangkut ti dikena sida datai ke Miri.

Hotel bala finalis enggau komiti ACSJ mega disediaka pechuma ulih RTM Sarawak. Lagu Iban ulih setanding enggau lagu bukai enti diberi suah agi peluang mantaika diri ba panggau ti besai, dikemataka juri profesional lalu diberi peransang ari orang ke udah besai nama ba industri pemerindang.

Udah tu kitai sama arap mayuh agi lagu enggau muzik Iban ti bekualiti ba anugerah charta sapa juara. ACSJ ke-6 udah meri kitai siti tikas lagu Iban bebanding enggau lagu bukai di menua tu.

Ayan terus ba TV enggau mayuh agi orang meri belanja mega siti ari chara kitai ngangkatka nama lagu Iban. Deka datai agai standard enggau tikas nya kitai meseti besabar; naka ulih nitihka standard orang bukai laban TV sigi udah bisi standard kediri.

Sama seati mih kitai ngaga lagu ti lebih bekualiti enggau enda ninggalka nama enggau identiti bansa diri. Beri penuduk ti tinggi ungkup lagu Iban laban enti kitai empu enda sapa agi. Orang bukai deka kurang basa agai kitai enti kitai empu enda bebasaka lagu diri empu.

Suara Sarawak