Pemutus Agong enda ulih disakal

KOTA SAMARAHAN: Pemutus Yang Dipertuan Agong pasal Proklamasi Darurat enda ulih disakal kelebih agi pengudah besibil penemu entara akim dua kort suba bekaul kuasa Agong dalam Artikel 150.

Ku Penulung Mandal Chanselor Universiti Malaysia Sarawak (Unimas), Profesor Datuk Mohd Fadzil Abdul Rahman, kededua raban udah mantaika jurai enggau penemu sida ke bisi merit kediri empu.

“Taja pia, pengudah beratika kuasa Yang Dipertuan Agong, Konstitusyen Perintah Besai Artikel 150 nya diubah baru lalu ngemasukka klausa (pengudah isu Teh Cheng Poh ngelaban Pedawaraya dalam siti kes berprofil).

“Pemutus Yang Dipertuan Agong udah nya ditetapka ngambi enda ulih disakal sebarang kort,” ku iya nerang.
Modh Fadzil mansutka jaku nya ngagai Suara Sarawak lebuh ngelansa isu pasal kuasa Yang Dipertuan Agong ngaku Proklamasi Darurat enda ulih disakal sebarang kort, ensanus.

Nambahka nya ku Mohd Fadzil, Artikel 150 (8) udah negapka agi penerang tu.

“Nya kebuah, pemutus Yang Dipertuan Agong nya tetap enggau enda ulih disakal.

“Bekaul atur ditetapka di baruh darurat nya ngaul kuasa enggau atur dipasuk ke alai bisi nyebut atur pengawa ba Perintah Besai enggau nengeri nya bepanggai ngagai iya sekumbang bejalaika perintah darurat.

“Pasal tanya sekalika Pengawa Bepilih Nengeri (PRN) Sarawak ulih dipejalai tauka enda, pengawa bepilih nengeri tauka pengawa bepilih besai enda ulih dipejalai sekumbang perintah darurat dipejalai.

“Pekara tu mega udah diterangka Menteri Besai maya mantaika darurat pasal pengawa bepilih enda dipejalai taun tu,” terang iya.

Taja pia ku iya, agi bisi orang mantaika penemu pasal sekalika ulih tauka enda pengawa bepilih diatur maya darurat ari raban undang-undang empu.

“Tu bepelasarka chuntu PRU keterubah enggau kedua ti udah diatur dalam taun 1955 enggau taun 1959 maya perintah darurat benung diterit.

“Tang pekara ke nyadi lebuh nya bebida amat enggau darurat e diatu sekalika ari sukut status enggau pejalai politik.

“Siti pekara ke enda diperati lebuh meri penemu pasal penerang tu iya nya, YDP Agong empu mesti bisi kaul enggau sanding penemu ari Menteri Besai,” terang iya.

Mohd Fadzil mega madahka maya darurat dipejalai, endang udah dirintai pasal pengawa bepilih entara pekara ti enda ulih dipejalai sekumbang timpuh proklamasi darurat tu.

“Nya alai, pekara nya enda ibuh dibantai baru enti pekara nya udah bisi pemutus iya.

“Pekara ke patut dikereja diatu iya nya nganti timpuh ke patut pengudah perintah darurat ditarit pulai lalu udah nya, parlimen tauka Dun dipadam.

“Udah nya, baru isu pengawa bepilih tu tau dibantaika baru,” terang iya.

Suara Sarawak