KUCHING: Pemutus Datuk Ali Biju nyurutka diri nyadi chalun Dun Krian nunjukka iya talukka peminta Parti Pribumi Bersatu Malaysia (Bersatu), ku Profesor Datuk Mohd Fadzil Abdul Rahman.
Ku Pemikir Politik nya, enti dipeda ari pekara positif, pemujur nya pekara ti patut dikereja taja iya nyau enda ngetanka penuduk Dun Krian.
“Ba aku, iya nyau tepekul ba dua pekara ke alai keterubah nya, iya udah teleba enggau peranak Krian sereta dikelala rayat dia.
“Taja pia, iya nyau enda ingatka tanggungpengawa ba Parti Bersatu lalu pemutus bediri nyadi chalun Independent nya baka enda bebasaka pemutus raban supreme parti nya.
“Nya kebuah, pemutus nyurutka diri nyadi chalun Dun Krian tu ukai ngasuh tekenyit laban udah diamba… enti iya neruska pengawa nya engka deka diukum nyengkaum dibuai ari parti,” terang iya.
Berebak enggau nya ku Fadzil, Ali mesti meda pengawa enda ngetanka penuduk Dun Krian nya ari sukut positif.
“Taja nya pedis laban iya enda nangkup peminta ba sitak nya tang nya mega pekara ti manah ngambi nyaga pemanah kaul Parti Bersatu enggau Gempung Parti Sarawak (GPS).
“Kitai mega meda mayuh ti ulih dipejalai ba sitak Krian nyengkaum pemansang mantu rayat,” ku iya nyemetak madah.
Fadzil madahka diri enggai nyaut pekara nya enggau silik laban nya di baruh bidang kuasa raban bekaul enggau undang-undang lebuh ditanya bekaul nama Ali agi menang dalam keretas undi taja udah nyurutka diri.
Ungkup rikod, Ali nyurutka diri nyadi chalun ba Dun Krian ensanus lalu deka meri sukung penuh ngagai chalun GPS, Friday Belik.
Iya madahka pemutus nya ngambi nyaga sereta negapka kaul rat entara Perikatan Nasional (PN) enggau GPS.
