Pemutus Chairman Petronas patut dititih

SIBU: Kaban Dewan Negara Senator Robert Lau Hui Yew deka Kaunsil Direktor Petronas nitihka pemutus akim enggau Chairman iya, Menteri Besai Tan Sri Muhyiddin Yassin mayar chukai jual ngagai Sarawak.

Ku Lau ti baru dichiri nyadi Senator minggu nyin kemari madah, iya berasai irau ati lebuh macha berita madahka Kaunsil Direktor Petronas ngelanggar pemutus Muhyiddin ngasuh Petronas mayar chukai jual Sarawak.

“Aku ngarapka ulah kaban kaunsil baka ti diripotka nya semina jaku bula aja.

“Menteri Besai ti tetap penemu minta Petronas mayar enggau nitihka undang-undang Sarawak nya endang pemutus ti engkeman.

“Menteri Besai nya Chairman Kaunsil sereta serikat nya enggau kaban kaunsil enda ulih ngelanggar pemutus Menteri Besai,” ku iya meri penerang, Hari Minggu tu tadi.

Ku iya, Petronas bekait sekalika ari sukut undang-undang ngambi mayar chukai jual ti ditetapka Perintah Sarawak.

Terang iya, Sarawak udah menang ngelaban Petronas ba chukai jual lalu Petronas meseti nitihka pemutus kort.

“Petronas meseti nitihka undang-undang Sarawak lebuh ngali ba Sarawak laban Petronas ngali ba nengeri bukai.

“Sama mega sida meseti nitihka undang-undang menua,” terang iya.

Ku Lau, Petronas meseti beterima kasih enggau pengaya ti diambi sida ari tebing pantai Sarawak pengelama 50 taun ke udah.

“Nya kebuah, manah agi kaban kaunsil nemuai ke Sarawak ngambi beratika pemansang menua tu ti jauh tinggal enti dibanding enggau Semenanjung Malaysia lalu sida meseti beterima kasih enggau pengeraja sereta ngenang pemanah Sarawak,” ku iya nyemetak madah.

“Siti ari semaya digaga bala ketuai Tanah Melayu ngagai peranak Sarawak ngambi begempung numbuhka Malaysia ba taun 1963 iya nya Sarawak deka jampat maju sebaka enggau Semenanjung Malaysia ari sukut pemansang.

“Nya mih semaya digaga ketuai menua kitai ngambi mai Sarawak (enggau Borneo Utara) begempung numbuhka Malaysia.

“Rayat Sarawak semina minta utai ti udah disemaya lalu bejalaika pemansang ti sebela,” ku Lau nyemetak madah.
Nangkan nya ku iya, mayuh penguntung udah diambi Petronas enggau semampai diambi ari Sarawak.

Iya mega madah, kelalu lama pemayuh minyak enggau gis ti digali ari tebing sungai Sarawak udah dikena ungkup bejalaika pemansang ba Semenanjung Malaysia nyentuk Sarawak enda dikemansang.

“Projek mega baka Menara Berkembar Petronas enggau Putrajaya mega dipelanja ngena belanja tu.

“Petronas mayar dividen bepuluh bilion ninting taun ngagai Perintah Besai pengelama berapa puluh taun tu,” ku Lau nandu penerang iya.

Taun tu, iya madahka Petronas mayar RM24 bilion ngagai Perintah Besai enggau diripotka sida diasuh bayar mayuh agi dividen taun tu.

“Taun nyin kemari, Petronas udah mayar dividen penyampau RM54 bilion ngagai Perintah Besai,” ku iya.