Pemutus digaga JPBN dipuji

KUCHING: Presiden Serakup Besai Komuniti China Bagi Menua Kuching, Samarahan enggau Serian Datuk Richard Wee muji Komiti Penyaga Penusah Ngenyit Nengeri (JPBN) laban ti chakah sereta jampat mutarka penanggul pengerekai igi penyakit Covid-19 di menua tu.

Iya madahka JPBN ngaga pemutus ti engkeman lebuh netapka operasyen bedagang naka pukul 10 malam laban endang udah berandau enggau perintah besai.

“Pekara nya enggai enda diatur ba Sarawak laban meri empas ngagai rayat menua.

“Meda gaya kes ke nyadi ditu udah majak manah, aku ngarapka timpuh tikas orang bedagang ngagai pukul sepuluh malam nya dilanjarka agi,” ku iya lebuh ditanya pemberita maya ngulu pengawa nyadung KGC ditu, kemari.

Richard madah, pekara nya patut digaga ungkup pejalai operasyen dagang baka restoran enggau bistro.

Iya mega andalka pengidup rayat ulih pulai ngagai normal enggau lengkas.

Taja pia, kenu ku iya, pekara ti nyadi maya tu ngasuh semua orang enggai nyadi enda bejimat.

“Aku nemu, enda semua orang rinduka pekara tu kelebih agi sida ti bedagang.

“Sida enggai nyadi enda nitihka pejalai pengidup chara baru baka tikas jam bedagang enggau pekara bukai,” ku iya

Kelimpah ari nya, iya mega ngaku runding takut keluar agi tebal ba ati semua orang.

“Ambika chunto lebuh perintah madah ulih muka sekula bulan nyin tadi.

“Semina 60 ke 70 peratus aja bala apai indai ngemendarka anak sida nurun sekula.

“Tebal agi sida agi nangi nganjung anak besekula taja pan piak sekula nitihka atur pengawa standard (SOP) ke ditetap perintah,” ku iya.

Suara Sarawak