Pemutus Emperan Pedalai Mansau berumah panjai baru endang patut

KAPIT: Bisi 21 ketuai bilik deka ngasaika pengelantang pengudah nerima RM105,000 dikena ngentak rumah panjai baru ba Emperan Pedalai Mansau, Ibau ditu.

Menteri Dagang Dalam Menua enggau Pekara Penguna, Datuk Seri Alexander Nanta Linggi madahka agih belanja nya dikena nambah agih belanja diberi Adun Bukit Goram, Jefferson Jamit Unyat ungkup tuju ti sebaka.

Nanta madahka 21 ruang bilik nya udah ngaga pemutus ti engkeman lebuh deka pindah enggau ngentak rumah panjai baru.

Iya ke mega Kaban Parlimen Kapit, taba rumah panjai baru nya bisi pengulih ari sukut pemansang ekonomi dudi hari.

Kandang menua nya ngembuan rampa menua ke ulih diangkat nyadi produk ekonomi dagang temuai kelimpah disikap jalai penyambung ke meruan agi.

“Endur tu engkeman nyadi eko-dagang temuai dikena nyungkak ekonomi rama peranak ditu.

“Aku mega nerima manah perambu ngangkatka rumah panjai tu nyadi palan eko dagang temuai.

“Kami deka mantu ari sukut nyikap jalai penyambung, ngelakuka produk sereta pengelikun temuai tauka pengusung,” terang Nanta.

Nanta mansutka jaku nya pengudah ngabas taba rumah panjai baru nya, ditu pagi tadi.

Berita penuh Ruai 3 pagila.

Suara Sarawak