Pemutus Jerip patut dipebasa

KUCHING: Pemutus Kaban Kunsil Nengeri (Adun) Mambong Datuk Jerip Susil ningkilka diri ari Parti Sarawak Bersatu (PSB) patut dipebasa ku penemu Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Datuk Seri Fatimah Abdullah.

“Tu pemutus ari ati iya empu pansut ari parti lalu kitai patut bebasaka pemutus nya.

“Kebuah pia laban tu penetap penemu iya ba mua mayuh nyurutka diri lalu belalauka penerang ari iya empu diperati agi nyukung Gabungan Parti Sarawak (GPS) semina iya badu sebilik enggau PSB aja,” ku iya.

Fatimah mansutka penemu nya lebuh dirandau pemberita pengudah Pengawa Nyuaka Tanda Basa Volunteer Opis Pengintu Pengelantang Mensia Mayuh (JKM) enggau Pengawa Ngaku Bakih JKM, ensanus.

Lebuh ditanya sentang pengawa ti deka dipejalaika Jerip sekalika deka nyemilik Parti Pesaka Bumiputera Bersatu (PBB), Fatimah madahka iya enda nemu pasal pekara ti deka dipejalaika Jerip udah tu.

“Kitai enda nemu pemutus ti deka digaga iya. Anti aja enti sema iya bisi nganjung peminta nyadi kaban.

“Enti sema iya bisi ati nyemilik GPS tang kitai enda nemu ni bagi parti laban semua tu deka diputuska parti lalu pemutus nya bepanggai ba iya empu,” ku Fatimah nerang.

Pia mega ku iya, sebarang pekara ulih nyadi seagi pekara nya ngaul politik.

“Kitai enda nemu meragam semua utai tu laban parti ti dipilih iya ila ti deka nentu enggau ngaga pemutus laban ba politik tu semua utai ulih nyadi, enda ulih disagam,” ku iya nerang ngagai pemberita.

Fatimah Abdullah