Pemutus kes NCR Dayak ngasaka ati

KUCHING: Menteri Kereja Raya, Baru Bian berasai asa berindik ari pemutus Kort Besai nulak peminta komuniti Iban ari dua buah genturung pendiau di Sarawak beratika baru pemutus Hak Tanah Adat Asal (NCR) sida ti nadai kuasa undang-undang ba menua tu.

Ba pemutus majoriti 4 -1 ari panel lima akim kemari, Kort Besai mutus nadai kebuah panel baru beratika baru pemutus tumu kort.

Akim Besai Malaya, Azahar Mohamed enggau bala akim Kot Besai Alizatul Khair Osman Khairuddin, Idrus Harun enggau Mohd Zawawi Salleh ngaga pemutus majoriti seraya Akim Besai Sabah enggau Sarawak David Wong Dak Wah ningkah.

“Aku chukup bebasaka pengawa dilempai ngagai kort ngambika ngaga sebarang pemutus di baruh undang-undang.

“Tang ari gaya pemutus kemari, mai reti pekara ti dikeandal kami ngambika diterang silik enggau ditetap, sekalika Pemakai Menoa enggau Pulau Galau bisi kuasa undang-undang apin ulih disaut,” ku iya madah nyemetak.

Hak NCR ti ditampung belalauka Adat Iban, Pemakai Menoa enggau Pulau Galau.

Pulau Galau diberi ngagai tanah ungkup peranak genturung pendiau dia beridup baka berikan, ngasu enggau ke bukai.

Tanah enda diperimba ngambika utai idup enggau utai tumbuh ba kampung ulih idup meruan.

Pemakai Menoa mungkur genturung pendiau ti dikumbai reta pesaka nyengkaum kandang rumah panjai sereta Pulau Galau.

Baru mansutka jaku tu belalauka kes taun 2001 ke alai Nor anak Nyawai enggau tiga sida ke bukai dalam kes ngelaban kompeni enggau opis bekaul.

“Reti iya, kami peranak Sarawak enda tau enda negi enggau minta hak NCR dataika siti agi pemutus Kort Besai nginsil kes Nor Anak Nyawai tu,” tandu iya.

BARU BIAN