Pemutus Kort Tinggi patut dipebasa

KUCHING: Ketuai Nembiak Parti Rayat Sarawak (PRS) Datuk Snowdan Lawan minta raban bukai nerima sereta bebasaka pemutus Kort Tinggi ti ngemendarka leka jaku Allah dikena raban orang ukai Islam.

Iya madahka kort udah ngaga pemutus lalu pekara nya patut dipebasaka.

“Nyema bisi penanggul ti deka dikemujur, anang ngelakka penanggul nya ayan baru, kelebih agi lebuh kort udah ngaga pemutus.

“Ngambika sama adil, pekara tu udah diputuska nitihka kort. Terima aja pemutus nya,” ku iya.

Snowdan madahka munyi nya nimbal penemu Gerempung Nasional Melayu Bersatu (Umno) enggau Parti Islam Se-Malaya (Pas) minta perintah ngaga apil ngagai pemutus Kort Tinggi ngemendarka peminta mansik nitihka undang-undang ngagai siku raban Kristian ari Sarawak Jill Ireland ti ngena leka jaku Allah dalam pelajar pengarap iya enggau ngemendarka leka jaku Allah dikena raban ukai Islam.

“Berapa mayuh agi penerang tauka apil deka digaga sida, sebedau kitai bebasaka pemutus kort?,”ku iya.

Snowdan ti mega Adun Balai Ringin madahka awak enggau jam raban kort udah mayuh tebasau kenyau 2008 maya isu tu tebantai 13 taun ke udah.

Nangkan nya, Snowdan madahka Sapit Kepala Menteri Tan Sri Datuk Amar Dr James Jemut Masing udah nyebut pekara ti nyengkalan laban nadai patut parti politik ngaga peminta ngagai perintah ngambika ngaga apil bekaul enggau isu tu laban Malaysia sebuah menua ti ngembuan mayuh pengarap.

“Kitai benung ba politik ti enda tegap ba sepiak nyin, nyadi ulah udu ngidupka baru isu ti ekstrem baka nya sigi enda patut,” ku iya

Suara Sarawak