Pemutus nganjung anak ke sekula, hak apai indai

KUCHING: Pemutus apai indai ti enggai nganjung anak ke sekula taja pan operasyen sekula udah dibuka dikearap enda ngenusahka raban pengajar.

Chairman Serakup Pengajar Bumiputera Sarawak (KGBS) Ahmad Malie madahka mayuh apai indai agi nangi nganjung anak ke sekula laban pengerekai penyakit Covid-19 diatu.

“Pengirau ati nya ngujungka sida enggai nganjung anak ke sekula taja pan operasyen sekula udah dibuka iya nya pengajar enggau nembiak ulih belajar betemu mua.

“Serakup kami ngasaika nya hak apai indai, tang pemutus sida nya dikearap enda ngenusahka raban pengajar baka minta pengajar ngajar anak sida nengah online taja belajar betemu mua udah dipejalaika,” ku iya.

Ahmad Malie bejaku munyi nya lebuh dirandau Suara Sarawak ba opis KGBS ditu, pagi tadi.

Ku iya, serakup nya irauka apai indai ti enggai nganjung anak ke sekula betemu mua enggau pengajar deka minta raban pengajar ngajar anak nengah online.

“Sida enda tau nyalahka pengajar enti pengajar enda ulih ngajar anak sida nengah online laban tanggungpengawa pengajar ngajar ba kelas udah meruan.

“Lebuh sida ngambi pemutus enggai nganjung anak besekula betemu mua enggau pengajar anak nya udah nyadi tanggungpengawa sida empu.

“Taja pia, KGBS meransang apai indai ngambika anang enggai nganjung anak ke sekula lalu pechayaka Atur Pengawa Standard (SOP) ti udah diatur,” ku iya.

Tandu iya, apai indai manah agi nitihka taga sekula ti udah diperambu bala pengajar ngambika bala anak sida enda tinggal pelajar.

“Nyema pengajar ngajar betemu mua ba sekula, maya nya mega pengajar ngajar ngena online, menua kitai bedau bisi keresa moden nyukung pekara tu,” ku iya.

Suara Sarawak